Ergys Kaçe drejt Gallatasarajit, ja prapaskena

Transferim i mundshëm për mesfushorin kuqezi, një holandez bëhet "shkes"

Merkato e transfer imeve nuk është hapur ende, mirëpo lajmet që përfshijnë futbollistë të ndryshëm me lëvizje të mundshme kanë nisur. Një prej tyre raporton për një transferim të mundshëm të Ergys Kaçes te gjiganti turk, Gallatasaraji. TRANSFERIMI

PAOK dhe skuadra turke kanë shkëmbyer një futbollist në të shkuarën. Bëhet fjalë për futbollistin holandez Geri Rodrigez, i cili aktualisht po shërben si "shkesi" i një transferimi të mundshëm për shqiptarin. Rogrigez është aktualisht pjesë e skuadrës turke, e cila kërkon ta shesë atë dhe PAOK-u i ka ofruar një mundësi shkëmbimi. Skuadra greke, në fillim të sezonit e huazoi Kaçen për një vit te çekët e Viktoria Plzen, por shqiptari nuk qëndroi atje as gjysmën e sezonit. Kaçe u kthye sërish në Greqi dhe nuk ka gjetur mjaftueshëm hapësirë në skuadrën ku u rrit dhe u formua si profesionist. Së fundmi, mediat greke raportojnë se PAOK-u ka ofruar Kaçen për Gallatasarajin në këmbim të Rodrigezit. Duke parë interesin e të dyja palëve për anësorin holandez, mediat greke bëjnë me dije se edhe përfshirja e shqiptarit në transferim është më se e mundshme. E ARDHMJA

Gallatasaraji do të ishte një mundësi e mirë për futbollistin kuqezi, jo vetëm për emrin që ka, por edhe për faktin se skuadra turke do të tentojë pjesëmarrjen në fazën e grupeve të Europa Ligës. Kaçe u aktivizua edhe në fillim të këtij sezoni në këtë kompeticion me Viktoria Plzenin, mirëpo prishja e marrëdhënieve me të bëri që ai të rikthehej që në muajin nëntor te PAOK-u. Duket qartë interesimi i PAOK-ut për të transferuar shqiptarin, mirëpo mbetet për t'u parë se cili do të jetë ekipi në të cilin do të transferohet gjatë merkatos.