Skema sulmuese dhe optimizëm, bluzinjtë gati të thyejnë Kukësin

Luftëtari, nën drejtimin e trajnerit Mlladen Milinkoviç, është duke vijuar përgatitjet për ndeshjen e fundit të sezonit, që do të luajë në shtëpi ndaj Kukësit, skuadër e cila tashmë ka arritur të fitojë titullin kampion. Në fushën e stadiumit "Gjirokastra", bluzinjtë më shumë se të vendosur për të dhënë maksimumin e pritshëm, kur bëhet fjalë për një takim kaq të rëndësishëm, ku fitorja do t'i jepte ekipit vendin e katërt në klasifikim. Të grupuar mes njëri-tjetrit pas disa ushtrimeve me karakter aerobik, tre trajnerët, Milinkoliç, Jovanoviç dhe Papa, të ndihmuar dhe nga përgatitësi i portierëve kanë orientuar futbollistët në një seancë stërvitore intensive. Të ndarë në dy gjysmëfusha në drejtimin e Milinkovicdit në njërin krah, Papës në qendër si dhe Jovanoviçit në krahun tjetër futbollistët bluzinj përmes ushtrimeve të lojës me topin treguan se çdo aksion i ndërtuar duhet përfunduar me sukses. Nga ana tjetër, me portierë Rokon dhe Ruçin nuk munguan dhe goditjet drejt portës. Çdo ushtrim kishte rrjedhë logjike, atë të lojës së shpejtë sulmuese, pa mohuar pozicionimin në mbrojtje. Mes pushimit të 30 minutave, 22 futbollistët pjesëmarrës në seancën stërvitore nuk vonuan të formonin rrethin e zakonshëm mes dy grupeve, me opsion kontrollimin e topit deri në pasin e fundit. Nuk kanë vonuar minutat e ekzekutimit të goditjeve të shkurtra standarde në vijën fundore, të alternuara këto me përfundimin e topit në zonën e portierëve respektivë. OPTIMIZMI - Ajo që është vënë re në seancën e djeshme stërvitore ishte optimizmi dhe siguria mes lojtarëve për të marrë një rezultat pozitiv ndaj Kukësit. Mungesa e Behar Ramadanit në seancën e djeshme stërvitore, si dhe ajo e gardianit Festim Miraka, shtuar këtu edhe mungesën e Albano Aleksit të skualifikuar duket se e rrisin shkallën e vështirësisë për formacionin bluzi, kur bëhet fjalë për një ndeshje më shumë se jetike, përballë Kukësit. Tomor Shehu