Daja në alarm për formacionin, 11 mungesa në ndeshjen ndaj Partizanit
Korçarët, me sytë nga Disiplina për Salihin dhe Muzakën
Kategoria Superiore i ka dhënë verdiktet e saj, pasi Kukësi është shpallur kampion. Megjithatë, për trajnerin e Skënderbeut, Ilir Daja, ndeshja ndaj Partizanit, e cila do të luhet për të respektuar kampionatin, do të jetë mjaft e vështirë. Ajo që e vështirëson punën për trajnerin kryeqytetas është numri i madh i mungesave që Skënderbeu ka ditët e fundit. Mund të themi se bardhekuqtë kanë minimalisht 10 mungesa nga ekipi i parë, çka do të thotë se janë vetëm 13 lojtarë në dispozicion për trajnerin bardhekuq. Veç mungesave të sigurta të Lilajt, Abazit dhe Malajt duke shtuar këtu edhe të pezulluarit Osmani, Mici, Radas dhe Latifi, trajnerit të Skënderbeut duket se i duhet të bëjë llogaritë edhe me mungesat e tjera që vijnë për situata të ndryshme, por edhe dënimet që pritet të vijnë nga vendimi që do të jepet nga Komisioni i Disiplinës ditën e sotme. Më të rrezikuarit nga ky dënim dukshëm janë Salihi dhe Muzaka për shkak të ngjarjeve në ndeshjen ndaj Kukësit. Megjithatë, një gjë e tillë mbetet për t'u parë. Një situatë e tillë e ka bërë me dhimbje koke trajnerin kryeqytetas që sikur të mos mjaftonin këto probleme shtohet në listë edhe mungesa e Reza Karimit, i cili është në Iran, për t'u paraqitur në shërbimin ushtarak të detyrueshëm, si dhe Fukui që prej kohësh është jashtë ekipit pas një problemi shëndetësor në kocka dhe po merr mjekim të specializuar në kryeqytet. Pak a shumë një situatë e tillë bëhet thuajse e pamundur për trajnerin e Skënderbeut në ndërtimin e formacionit që me mungesat që ka në ekip duhet "shpikur" nga e para. Me formacionin e
mundshëm, duket se Daja do të ketë shumë probleme, pasi duhet të llogarisë mirë edhe numrin e lojtarëve të huaj në formacionin e titullarëve si dhe ata që do të jenë në stol të detyrueshëm për këtë takim. Tashmë nuk është çudi që për takimin e së shtunës Daja të ketë në stol emra të rinj që do të vijnë nga ekipet e moshave.
LATIFI-MICI - Më shumë se kushdo tjetër, trajnerin e Skënderbeut e shqetëson gjendja e Micit dhe Latifit që kanë lënë të dëmtuar fushën e lojës në ndeshjen e Kukësit. Futbollistët duket se kanë ende probleme dhe nuk ishin
të pranishëm në seancën e djeshme stërvitore. Sipas asaj çka raportohet edhe nga stafi mjekësor i ekipit të Skënderbeut, të dy lojtarët pritet që të "kurohen" në Serbi. Sërish "magjistarja" Marjana pritet që të ketë vizita nga Skënderbeu brenda një kohe shumë të shkurtër pasi më herët ka rikuperuar Osmanin dhe Salihin. Dukshëm ky është një vendim nga klubi që kërkon të ketë sa më shpejt të jetë e mundur në ekip dy futbollistët, pasi në fundin e muajit do të luhet edhe finalja e Kupës ndaj Tiranës. Llazi Saro