Ilir Nasto i akuzuar për trukime, bashkë me Arben Tolen

Tre vite më parë, ekzaktësisht më 9 mars 2014, gazeta "Panorama Sport" ka publikuar një skandal trukimesh duke shpjeguar skemën e funksionimit si dhe përfshirjen e disa shqiptarëve në atë rrjet. Një prej emrave të lakuar dhe të përfshirë në skandalin në fjalë për të cilin janë ndaluar nga policia austriake, është Ilir Nasto. Personi, të cilit i është bërë dëmi i supozuar në akuzën e ngritur nga Prokuroria për Rrakllin, është një nga shqiptarët e përfshirë në skandalin e disa viteve më parë në Austri. Ai, së bashku me Arben Tolen, kanë qenë dy figurat kryesore të rrjetit të trukimeve që funksiononin jo vetëm në Austri, por edhe në vendin tonë.

Ja kush janë shqiptarët dhe skema e organizatës - Ka qenë goditja më e rëndë që i është bërë ndonjëherë mafies së trukimeve në Austri. Falë bashkëpunimit të "Operacionit Rinas" dhe Shërbimit të Kontrollit të Brendshëm (BKA), policia bëri të mundur arrestimin e 6 autorëve të këtij krimi ekonomik. Gjithashtu, u bënë kontrolle të detajuara në apartamente dhe vende të fshehta në Landin më të madh të Austrisë "NiederOsterreich", si dhe në qytetet Salzburg e Kernten. Nga ky operacion, hetuesit zbardhën se si funksiononte organigrama e këtij grupi manipuluesish, ku figura kryesore ishte 51-vjeçari nga Tirana Ilir N. dhe i besuari i tij po nga Tirana, 42vjeçari Arben T. Të dy shqiptarët jetonin kryesisht në Vjenë. Pas arrestimit të tyre u gjet një listë me 26 emra. Ja si funksiononte dhe cilët ishin protagonistët e këtij skandali:

Ilir Nasto - 51-vjeçari nga Tirana ishte figura kryesore e këtij skandali. Ai u spiunua dhe u arrestua nga "Operacioni Rinas" në Vjenë. Ilir N. ishte dhënës parash i Johanes Lampreht dhe Sanel Kuljiç. Pasi merrte informacionin dhe gjente akordin për trukim, ai ndante "tortën", duke përcaktuar shumat fituese të secilit prej tyre. Njeriu i tij më i besuar ishte shqiptari tjetër, Arben Tole, i cili thuhet se është dhëndri i Ilirit.

Arben Tole - 42-vjeçari nga Tirana kishte një rol ndërmjetës mes "eprorit" Ilir N. dhe të tjerëve. Arbeni merrte informacione nga Johanes L., si dhe ishte ndërmjetës mes mbrojtësit austriak Dominik Taboga dhe Ilir N. Kurse me austriakun tjetër, Sanel Kuljiç, ishte i lidhur vetëm për akordet.