Kombëtarja e femrave, sa shumë dyshime…

Pak muaj më parë, Kombëtarja e Femrave në futboll anuloi në mënyrë të dyshimtë një miqësore të programuar për t'u luajtur kundër Malit të Zi. Jo vetëm kaq, por një ishtrajner i saj është përfshirë disa herë në akuza të ndryshme, e cila vijon me këtë të ditëve të fundit nga prokuroria e Tiranës. Dyshimet - Mister dhe dyshime për anulimin e ndeshjes miqësore mes Kombëtares A të Shqipërisë dhe asaj të Malit të Zi për femra. Sfida e dytë pas të parës të luajtur në Elbasan nuk është zhvilluar. Takimi i parashikuar në datën 2 mars në Shkodër është anuluar. Në atë periudhë, Federata Malazeze e Futbollit, në njoftimin e saj, ka deklaruar se shkak për moszhvillimin e miqësores ishte helmimi i lojtareve të Kombëtares shqiptare. Ndërsa Federata Shqiptare e Futbollit argumentonte në njoftimin e vet se shkak ishte lodhja fizike e disa lojtareve, dëmtimet në sfidën e parë në Elbasan si edhe angazhimi i tyre në klubet respektive. Gazeta "Panorama Sport" ka investiguar në lidhje me këtë çështje dhe ka arritur në përfundimin se janë të shumta dyshimet dhe misteret që mbulojnë këtë vendim. Gjithashtu, nga zërat rreth ambientit të Kombëtares është mësuar se ka qenë një urdhër i mbërritur nga organizma të fuqishme nga jashtë Shqipërisë që nuk kanë lejuar që kjo miqësore të luhej, me argumentin se ishin luajtur shuma të konsiderueshme në baste duke hedhur dyshime. Pasi skuadrat pritën 2-3 orë në stadium u komunikua që takimi nuk do të luhej. Po si mund të ndodhë që vetëm përpara ndeshjes të konstatohej lodhja fizike e futbollisteve, në një kohë që kjo mund të ishte përcaktuar që një ditë përpara?! Që në këtë moment hidhen dyshimet e para. Burime pranë ekipit kombëtar bëjnë të ditur për gazetën se gjithçka ka ardhur për shkak të një vendimi nga jashtë Shqipërisë. Organizma të rëndësishëm të futbollit kanë lajmëruar që takimi të mos zhvillohej, pasi kishte pasur shuma të konsiderueshme bastesh të vendosura për të.