"Ishte ndeshje e mërzitshme, asnjë ekip nuk shkëlqeu"

Trajneri i Ajaksit, Peter Boz, ka befasuar me deklaratën e tij pas finales, ku edhe u mund me rezultatin 0-2. "Për mua ishte një ndeshje shumë e mërzitshme dhe mendoj se janë të shumtë ata që mendojnë kështu. Asnjë nga skuadrat nuk pati raste të pastra shënimi, pavarësisht se kundërshtari e gjeti dy herë rrugën e rrjetës. Prisja që të zhvillohej një lojë me ritëm më të lartë dhe me më shumë emocione", tha holandezi.

SKUADRA - "Ne kemi një ekip të ri, i cili deri tani ka bërë një paraqitje të kënaqshme. Kemi futbollistë të talentuar, që kanë ende nevojë për të fituar eksperiencë. Në finale nuk kemi treguar forcën tonë të vërtetë, por është normale që disa prej futbollistëve të vuanin psikologjikisht. Shumica nuk i kanë kaluar 20 vjeç dhe nuk ndiheshin ende gati. Por, vitin tjetër do jemi akoma më të fortë", shtoi Boz. JUNAJTID - "E kisha menduar që do tregoheshin të kujdesshëm, pavarësisht se kanë futbollistë të shkëlqyer. Gjithsesi, luajtën më tepër në mbrojtje dhe kjo më rezultoi e papritur. Goli i Pogbasë na penalizoi sa i përket vetëbesimit, pasi e pësuam shpejt. Më pas u munduam që të barazonim, por u përballëm me të paktën 8 lojtarë të Mançesterit në zonën e tyre dhe pa diskutim që nuk do gjenim dot hapësira".

TALENTET - "Ecuria që kemi pasur ka bërë që futbollistët tanë të jenë në qendër të merkatos. Gjithsesi, klubi ka një projekt afatgjatë dhe do vazhdojmë të ruajmë elementët më cilësorë. Synojmë që të rikthehemi në majat e futbollit, si në Holandë, ashtu edhe në kontinent. Besoj se deri tani kemi hedhur baza të forta, që japin garanci dhe optimizëm për të ardhmen", përfundoi deklaratën e tij Peter Boz.