Reali i relaksuar, ka kohë edhe për merkato

Ronaldo në superformë, ideohen blerjet dhe shitjet

REAL

Zinedin Zidan vazhdon të mahnisë, tek sa pas Ligës së Kampioneve, Superkupës së Europës dhe Botërorit për Klube në sezonin e kaluar, sivjet e ka plotësuar "rrethin" edhe me suksesin në kampionat, i cili mungonte prej vitesh. Por, për të mos i lënë mangët asgjë vetes, ai është për të dytin vit radhazi edhe në finalen e Championsit, për të tentuar atë që nuk e ka bërë askush që kur ky kompeticion ka ndërruar format: ta fitojë dy herë radhazi. Dhe duke parë paraqitjet dhe formën e shfaqur së fundmi nga skuadra, pa dyshim që "galaktikët" janë favoritë, sepse në anën e tyre kanë një Kristiano Ronaldo në formë mahnitëse. Përveç golave, ai ka edhe një dëshirë të çmendur për t'u sakrifikuar për ekipin, teksa në tri ndeshjet e fundit decizive në kampionat, u pa që të vraponte deri në mbrojtje, diçka që nuk e ka bërë kurrë në karrierën e tij. Me pak fjalë, euforia në grup është në maksimum dhe lajmet e mira nuk kanë të mbaruar... Zidan ka rikuperuar edhe mbrojtësin e djathtë, Dani Karvahal, një nga pikat më të forta të skuadrës, ndërsa i vetmi që mbetet ende në dyshim për në Kardif është Garet Bejl, i cili kërkon me çdo kusht që të luajë në shtëpi. Për të konfirmuar edhe më shumë atmosferën pozitive janë edhe lajmet që vijnë nga merkato. Pikësëpari Reali ka zyrtarizuar një nga talentet më të mëdhenj në qarkullim, Vilnicius të Flamengos, një mesfushor 16-vjeçar për të cilin kanë paguar 45 milionë euro (30 menjëherë, 15 milionë në formë bonusesh), me brazilianin që do të zbarkojë në "Bernabeu" në verën e vitit 2019. Nga ana tjetër, ata po mbyllin edhe disa operacione të rëndësishme në dalje, si shitja e Hamesit te Junajtid, por me shumë mundësi edhe Danilon tek Interi. Me valixhe në duar janë edhe Morata dhe Navas, ndërsa afrohet çdo ditë e më shumë portieri De Gea nga "Djajtë e kuq".