Milan favorit, 60 mln euro për Moratën
Mediat iberike: Kuqezinjtë, në vend të parë për sulmuesin
Eardhmja e Alvaro Moratës flet italisht. Kështu e nis artikullin e saj e përditshmja spanjolle "Marca", e njohur për kontaktet e saj të afërta me klubin merengues. Kampionati nuk ka mbaruar, por në kantierin "Milan" punimet vijojnë me ritme të ngjeshura. Kinezët kanë qenë të qartë, investime dhe një skuadër dinjitoze, për t'u rikthyer kuqezinjve dalëngadalë lavdinë e dikurshme. Objektivi kryesor është sulmuesi Alvaro Morata, përvojë, klas dhe moshë e re. Administratori i deleguar, Marko Fason, dhe drejtori sportiv Masimiliano Mirabeli vazhdojnë presingun ndaj Realit të Madridit dhe oferta kuqezi është në vend të parë mes atyre të mbërritura deri më sot në "Shtëpinë e Bardhë" madrilene. "Djalli" ka lënë pas kandidatura joshëse si ato nga Mançester Junajtid apo Çelsi. Ndoshta jo shumë në terma ekonomikë, por të paktën në ato taktikë Montela është i avantazhuar, pasi ndryshe nga homologët e tij në Angli, mund t'i ofrojë spanjollit një rol protagonisti në një kampionat që ai e njeh mirë, pasi ka luajtur me Juventusin. Një kartë tjetër në favor të alternativës milaneze është Aliçe, bashkëshortja e ardhshme e Moratës, e cila është italiane dhe mund ta shtyjë lojtarin që të zgjedhë Serinë A. Nuk është mister që pronarët e rinj të kryesuar nga Jonghong Li duan një emër bombastik për këtë merkato. 150 milionë eurot duhet të mjaftojnë për një skuadër dinjitoze, e cila disa emra cilësorë në organikë i ka. Reali kërkon të paktën 60 milionë euro dhe Milani nuk duket i trembur nga shifrat e transferimit. Mbetet ende për t'u diskutuar, ndaj takimi që vendos fatin e spanjollit pritet të ndodhë pas 3 qershorit kur të ketë përfunduar finalja e Ligës së Kampioneve.