"Fanatics" në bojkot, por tifozët do jenë në Shkodër

Anëtarët e "Tirona Fanatics" ende nuk janë bërë në një mendje. Përtej vullnetit dhe dëshirës që një pjesë e tyre shfaqën për të përkrahur ekipin në Shkodër, grupimi nuk ka marrë një vendim unanim për t'u rikthyer në stadium. Duke qenë se ndeshja me Vllazninë po afron dhe fjala e fundit e tifo- grupit mungon, shanset që ata të ndalin bojkotin janë minimale. Megjithatë, një gjë është e sigurt: në "Loro Boriçi" Tirana nuk do të jetë e vetme. Sportdashësit e bardhebluve kanë në plan që të marrin rrugën për në stadium, pasi nuk duan që ta lënë vetëm skuadrën në 90 minutat më të rëndësishme të historisë. Nuk do të udhëtojnë të organizuar, por me makina private. Nuk do të jenë masiv, por një prani sado e vogël, mund të ndikojë për t'u dhënë zemër kryeqytetasve në këtë "klasike" mbijetese.