Stërvitje pa presion, por Magani ka një "mal" me porosi

Edhe pse reshjet e shiut kanë qenë të dendura, Teuta nuk i ka ndalur përgatitjet. Ata kanë vijuar punën për ndeshjen me Laçin, me qetësi dhe përkushtim maksimal. Mbijetesa është siguruar dhe kjo u ka dhënë luksin "djemve të detit" që të largojnë presionin që i ka shoqëruar në pjesën më të madhe të këtij sezoni. Nën drejtimin e Gugash Maganit, ekipi për afro 90 minuta, në aneksin e stadiumit "Niko Dovana", ka kryer një seancë të larmishme. Peqinasi ka zhvilluar dhe një minindeshje brenda llojit, ku ka ndarë skuadrën në dy ekipe dhe ka parë formën e secilit prej tyre. Trajneri nuk i ka evituar kritikat as dje, ndërsa kërkon perfeksionin, sidomos në qarkullimin e topit. Ai i ka mëshuar ndjeshëm kësaj pjese, ndërsa u ka thënë prerazi futbollistëve që të mos nxitohen në largimin e topit kur janë në presion. Ai i ka porositur që të mos e shohin si zgjidhje shkelmimin e topit sa për të larguar përgjegjësinë, ndaj kërkon vetëm qetësi në kontroll dhe në pasim. Nëse lojtarët luajnë pa nerva, atëherë dhe ajo çfarë bëhet në stërvitje është më e lehtë për t'u praktikuar në ditën e ndeshjes. "Nervozizmi është armiku numër një dhe kjo duhet eliminuar", me këto fjalë u është drejtuar Magani të tijve. Skuadra po përgatitet të luajë një ndeshje pa pretendime, por me një kundërshtar që do me çdo kusht fitoren për të mbijetuar. Vllaznia dhe Tirana shpresojnë prej këmbëve të durrsakëve, por durrsakët e kanë trajtuar vetëm si një ndeshje radhe. Qëllimi është që ta mbyllin denjësisht sezonin, por rezultatin do t'ia lënë fushës. Jeton Rexhmati