Lutja e veçantë, Lushnja kërkon... naftë për tifozët
Tushe kërkon trofeun, 20 milionë lekë premio për ekipin
Lushnjarët kanë për funduar përgatitjet për finalen e titullit kampion që do ta luajnë sot në "Elbasan Arena". Përballë verdhejeshilëve do të jetë skuadra e Kamzës si fituese e grupit A. Skuadra e teknikut Artan Bano synon një tjetër trofe pas atij të fituar 12 ditë më parë. Kryetari i Bashkisë së Lushnjës, Fatos Tushe, që është edhe presidenti i klubit të Lushnjës, në një takim me ekipin, u ka kërkuar lopatarëve ta fitojnë këtë titull. "Besoj se do të kemi edhe trofe të tjerë për ekipin e Lushnjës", u ka thënë ndër të tjera Tushe lojtarëve. Ndërkaq, mësohet se ekipi do të përfitojë 20 milionë lekë të vjetër premio nëse e fiton titullin. SITUATA
Lushnja duket gati për finalen e sotme. Skuadra verdhejeshile duket favorite për të fituar finalen, pasi ka pasur një kohë të bollshme për të përgatitur ndeshjen. Të gjithë futbollistët janë të disponueshëm, me përjashtim të mbrojtësit të djathtë Endri Magani, por që edhe ai mund të jetë në pankinë. Skuadra verdhejeshile
pritet të mbështetet nga një numër i madh tifozësh, që kanë bërë gati dekorin. Për këtë, klubi lushnjar ka bërë një thirrje nëpërmjet një deklarate për shtyp: "U bëjmë thirrje bizneseve të karburanteve që ndodhen në territorin e Bashkisë së
Lushnjës që të japin kontributin e tyre dashamirës për të mundësuar transportin e tifozëve drejt Elbasanit. Deri tani klubi lushnjar parashikon që 2000 tifozë të udhëtojnë nga Lushnja për në 'Elbasan Arena'", ka deklaruar klubi.
"ISH- ët"
Janë plotë tre futbollistë të Lushnjës që, më parë, kanë luajtur për skuadrën e Kamzës. Është mbrojtësi Ledion Ruço dhe mesfushorët Ledjan Taullau dhe Okeljan Baze. "Është kënaqësi që do të luaj ndaj ish-skuadrës sime dhe presidentit Qarri, - është shprehur mesfushori Ledjan Taullau. - Do të luajmë për fitore për të treguar që jemi skuadra më e mirë e kësaj kategorie". Lushnja e ka traditë këtë trofe që e ka fituar për herë të parë në vitin 1960. Skuadra verdhejeshile fitoi 3- 2 në Fier ndaj Apolonisë me dopietën historike të trajnerit-lojtar "Roza Haxhiu" dhe me golin e Qemal Kukës që e dërgoi për herë të parë Lushnjën në elitë. Lushnjarët e kanë fituar edhe herë të tjera këtë Kupë, për herë të fundit në vitin 2013.