Demi: Nënvlerësuam të dobëtit
Që nga e mërkura, Besëlidhja ka nisur pushimet verore për t'u grumbulluar me njoftimin e presidencës, nga ku do të startojnë fazën përgatitore për llogari të sezonit 2017-2018. Gjatë sezonit që u mbyll, ndryshe nga shumë kampionate radhazi, në radhët e Besëlidhjes kanë luajtur si titullarë dy futbollistë lezhjanë të dalë nga ekipet e moshave vendëse, portieri Elson Demi dhe mbrojtësi Dritan Smajli që ka mbajtur edhe shiritin e kapitenit. Gardiani Elson Demi në prononcimin e tij për "Panorama Sport" shprehet: "Unë si lezhjan që jam, dua që t'i kërkoj tifozërisë falje, pasi atë që ua premtuam gjatë gjithë sezonit, në fund nuk ia dolëm. Dështimi ynë ka ardhur nga disa faktorë, ku fillimisht mendoj se një pikë kryesore ka qenë nënvleftësimi i skuadrave të vogla. Por, vulën e dështimit ia vuri gjykimi, ku jemi penalizuar disa herë, madje edhe në sfidën e fundit në Kamzë. Tashmë po mendojmë për sezonin e ardhshëm". Preng Gjikola