Mashtrim me premion, portieri ironizon: Sapo morëm "kempin"
Dinamo qëndroi në Kategorinë e Parë me shumë vështirësi. Dhe administratori Ismet Saliaj ishte ai që u premtoi lojtarëve nga 1.5 milionë lekë të vjetër premio nëse skuadra do të mbijetonte në të Parën. Por, ndryshe nga sa u premtua, dje janë shpërndarë vetëm nga 200 mijë lekë të vjetër për çdo lojtar. Ndërsa janë futbollistët ata që ankohen se akoma nuk kanë marrë rrogën e fundit, gjithashtu janë të zhgënjyer edhe për premion. Një ndër ta, që e ka shprehur publikisht pakënaqësinë e tij, është portieri Kadri Birja, i cili ka ironizuar në profilin e tij në "Facebook". "Sapo morëm kempin", ka shkruar Birja në status (kemp quhet pagesa që përfitojnë njerëzit me aftësi të kufizuara). Gazeta ka kontaktuar me administratorin Saliaj pikërisht për këtë çështje, i cili sqaron: "I falënderoj të gjithë futbollistët që kanë kontribuar për arritjen e objektivit që Dinamo të qëndronte sërish në të Parën. Ishte një sezon shumë i vështirë dhe jo i lehtë. Gjithashtu, edhe në aspektin ekonomik ka qenë jo e lehtë. Gjithsesi unë kam bërë maksimumin në bazë të mundësive që kam pasur. Jam munduar të jem korrekt, e gjatë kohës i kam ndihmuar, por kjo gjë nuk do të përfundojë këtu. Në vazhdim gradualisht do mundohem t'i ndihmoj dhe t'i shpërblej për kontributin që kanë dhënë", ka përfunduar prononcimin e tij për gazetën administratori Saliaj. Skerdilaid Sulozeqi