Kina bllokon merkaton nga Europa
Transferimi i Diego Kostës dhe Runit me shokë drejt Azisë këtë verë është në rrezik
Qeveria kineze e futbollit në bashkëpunim me Pekinin zyrtar kanë vendosur të kufizojnë shumat marramendëse të shpenzuara nga klubet kineze për lojtarët e huaj. Duke parë ofertat e çmendura në drejtim të yjeve botërore ka menduar të implementojë të ashtuquajturën "Taksë 100%", në bazë të cilës për çdo lojtar të huaj të blerë klubet do t'i paguajnë shtetit të njëjtën shumë edhe si taksë. Kjo është një përpjekjet për të ndaluar emigrimin drejt Ligës së Parë Kineze të lojtarëve si Uejn Runi apo Diego Kostas gjatë kësaj vere.
Vlen për t'u theksuar se taksa në fjalë nuk ka për qëllim pasurimin e arkave të shtetit, por ajo do t'i kalojë një fondacioni i cili do t'i menaxhojë paratë në kuadër të një projekti për rritjen e cilësisë nëpër ekipet kineze të moshave. Nëpërmjet një deklarate për shtyp, Federata Kineze e Futbollit sqaron: "Paratë e grumbulluara nga ' Taksa 100%' do të shkojnë për Fondacionin Kinez për Zhvillimin e Futbollit për të trajnuar futbollistët e rinj, për të rritur impaktin e futbollit në nivel shoqëror dhe për aktivitete bamirëse të lidhurat me sportin e topkëmbës". Në përpjekje për të ndaluar valën e investimeve faranike që po sillte gjithmonë e më shumë futbollistë të stërpaguar drejt Kinës, qeveria kineze pati nxjerrë më herët edhe një ligj që detyronte klubet e futbollit profesionist të zbrisnin në fushë me skuadra, të cilat përfshinin të paktën 3 lojtarë nën 22 vjeç. Duke parë se kjo nismë nuk ndaloi që të punësoheshin yjet si Tevez, i cili paguhej 1 milion euro në javë, atëherë u pa e udhës të merreshin masa të reja për të ndalur këtë mori transferimesh milionere. Qëllimi kryesor i këtyre nismave është ngjitja e Kombëtares kineze më lart sesa vendi i 81-të që mban aktualisht, përpara se t'u caktohet organizimi i Botërorit të vitit 2030.