Toti, lamtumirë Romës: Me Xhenoan, sfida ime e fundit
Kapiteni mund të zbarkojë në SHBA pas këtij sezoni
"Roma-Xhenoa, e diel, 28 maj 2017, hera e fundit në të cilën mund të vesh fanellën e Romës. Është e pamundur të shpreh në pak fjalë të gjithë atë që këto ngjyra kanë përfaqësuar, përfaqësojnë dhe do të përfaqësojnë për mua. Gjithmonë. Vetëm ndiej se dashuria ime për futbollin nuk kalon, është një pasion, pasioni im. Është aq e thellë sa nuk mund të mendoj se mund të ndalem ndonjëherë së ushqyeri atë. Asnjëherë. Nga e hëna jam i gatshëm të rifilloj, jam gati për një sfidë të re". Ishte kjo letra e hapur drejtuar tifozëve që kishte postuar dje kapiteni legjendar i Romës, Françesko Toti, një ikonë e këtij klubi, por edhe e futbollit italian dhe atij botëror natyrisht. Sulmuesi 40-vjeçar përgatitet t'u thotë lamtumirë ngjyrave të zemrës dhe të qytetit të tij pas 25 sezonesh të luajtura, por tani enigma e vetme është e ardhmja e tij. Edhe pse krerët e Romës i kanë garantuar atij një kontratë 6-vjeçare në postet drejtuese, fakt është që Toti mund të vazhdojë të luajë, pse jo në kampionatin amerikan, ku tashmë ka marrë një ftesë të hapur nga ish-shoku i tij i Kombëtares italiane, Alesandro Nesta, i cili stërvit skuadrën e Majemit. Gjithsesi, siç konfirmoi vetë Toti, ndoshta të hënën do të mësohet edhe e ardhmja e tij.