Nuk luan ndaj Vllaznisë, Lika: Shpresoja të dënohej Skënderbeu
Shkodrani: E mendova që s'do të luaja që pas Luftëtarit "Nuk e kam fare të lehtë, për fat klubi më mirëkuptoi"
Gilman Lika refuzoi që të luante kundër ekipit "mëmë", pasi nuk i bëjnë këmbët. Një gjest që gjeti mirëkuptimin e drejtuesve të Tiranës, paçka se nuk është aspak profesional. Vlen të kujtojmë që ai numëron shumë më shumë ndeshje si bardheblu sesa si kuqeblu. Në Shkodër është aktivizuar për vetëm 96 ndeshje zyrtare, ndërsa me kryeqytetasit plot 114. Por shifrat duket se nuk kanë rëndësi në të tilla raste, pasi mesfushori nuk do që të bëhet kurrsesi "armik" në qytetin e lindjes. Edhe pse me vështirësi, 30vjeçari gjeti forcën që të dalë para mediave dhe të japë motivet që e çuan deri në këtë vendim. "Sikundër është marrë vesh, unë nuk do të jem në këtë ndeshje. E di që është diçka jo profesionale, por të them të drejtën kam qenë në një situatë shumë të vështirë. Pas një takimi që kam pasur me presidentin dhe trajnerin, që i falënderoj shumë për mirëkuptimin që patën karshi meje, mora vendimin. Për mua është një ndeshje e jashtëzakonshme, nuk e kisha menduar kurrë që do të shkonte deri në këtë pikë dhe Tirana me Vllazninë do të luftonin për të siguruar mbijetesën. Shpresoj që edhe tifozët të më mirëkuptojnë për vendimin që kam marrë, duke ditur si po e përjetoj unë këtë periudhë", u shpreh fillimisht shkodrani i bardhebluve.
E ARDHMJA
Ai nuk beson se vendimi do të ndikojë në të ardhmen e tij te Tirana, paçka se e pranon se në mbyllje të këtij sezoni i "skadon" edhe kontrata. "Jo, nuk ka lidhje, nuk besoj se kjo ndeshje do të ndikojë tek e ardhmja ime. Këtë e them duke u bazuar te mirëkuptimi që shfaqën presidenti dhe trajneri për situatën time. Ndaj pres vetëm që edhe tifozët të më kuptojnë, prandaj
nuk besoj se do të ndikojë, paçka se mua në fund të këtij sezoni më mbaron edhe kontrata", sqaroi Lika, ndërsa konfirmon edhe mbylljen e marrëveshjes kontraktuale me përfundimin e këtij edicioni futbollistik. VENDIMI
Fill pas fitores me Luftëtarin, mesfushori e pat ndarë mendjen që nuk donte të luante kundër Vllaznisë. Duke qenë se të gjitha kalkulimet e kthejnë këtë në një "finale" mbijetese, ku o njëra o tjetra do të bien një kategori më poshtë, Gilman Lika e shtyu zyrtarizimin e vendimit duke shpresuar te Skënderbeu. Gjithkush mund
të pyesë se çfarë lidhje kanë korçarët në këtë mes?! Por duket se zërat dhe, mbi të gjitha "bomba" që lëshoi ish-presidenti i Flamurtarit, Shpëtim Gjika, ka bërë që edhe shkodrani të besojë në një rënie të Skënderbeut. Nëse kjo do të ndodhte, automatikisht ekipi i tij dhe ai i zemrës do të shpëtonin. "Të jem i sinqertë, vendimin e kam marrë direkt pas ndeshjes së Luftëtarit. Por u vonua, pasi shpresova dhe prita prej llafeve që po përfliteshin për një dënim të mundshëm të Skënderbeut. Por, meqenëse kjo nuk ishte e vërtetë, ndaj e zgjata deri në këtë ditë", përfundoi Lika.