Partizani, Moxhi në Korçë për blerjet e reja
Pas ndeshjes me Skënderbeun merr rrugë skuadra që do të përfaqësohet në Ligën e Europës Ish-drejtori i Juventusit ka premtuar përforcime cilësore jo vetëm në lojtarë, por edhe staf
Partizani do të jetë nesër mysafir në Korçë, por ndryshe nga sa ishte menduar më herët, ku flitej se ky takim do të përcaktonte titullin kampion, përballja është thjesht sa për të përmbushur kalendarin. Partizani dhe Skënderbeu nuk kanë asnjë objektiv për të synuar në këtë takim, përpos asaj që është përfolur në ambiente informale për një protestë të përbashkët të të dyja ekipeve për atë që ka prodhuar ky sezon futbollistik. Gjithsesi, të kuqtë e kryeqytetit do të shkojnë të mobilizuar drejt Korçës, pasi duan që ta mbyllin me nder sezonin sepse ky duel me korçarët vlen më shumë për krenarinë e tifozëve kryeqytetas, që do të jenë prezentë edhe në stadiumin "Skënderbeu". I pranishëm në tribunën VIP të stadiumit të Korçës do të jetë edhe këshilltari më i ri i presidentit të Partizanit, ish-drejtori i Juventusit, Luçiano Moxhi. Misioni i italianit është domethënës, pasi dihet se më këtë takim mbyllet sezoni 2016-2017 dhe menjëherë nis puna për formatimin e Partizanit të ri, që do të marrë pjesë në turin e parë paraeliminator të Ligës së Europës. Moxhi do të ketë mundësi që në këtë takim të krijojë një tjetër opinion për skuadrën e kuqe dhe më pas, në bashkëpunim me drejtuesit, do të vendosen pikat e skuadrës së re. Pas përfundimit të ndeshjes me Skënderbeun, ekipi do të ketë mundësi që të pushojë për dy javë dhe më pas lojtarët që do të vijojnë me "demat" do të thirren për të nisur minifazën përgatitore për ndeshjen e parë në Europë, ku më 29 qershor do të luajnë ndeshjen e parë në Ligën e Europës. Partizani i sezonit të ri pritet që të ndërtohet sipas shijeve dhe direktivave të Luçiano Moxhit. Ish-drejtori i Juventusit ka premtuar se do të sjellë lojtarë cilësorë për Partizanin dhe prova e parë mbetet gjatë ballafaqimit në Europë, ku synohet që minimalisht të kalohet 2-3 ture paraeliminatore. Mbetet për të parë se deri ku do të shkojë puna e Moxhit, pasi përveç lojtarëve është përfolur se mund të ketë edhe një ripërtëritje të stafit teknik. Gjithsesi, gjithçka mbetet që të mësohet pas përfundimit të transfertës së Korçës.