Salihi: E mbylla me Skënderbeun
“Bakaj dhe Gilman Lika u treguan joprofesionistë”
Emiljano Vila pranon para hetuesve vërtetësinë e bisedës së publikuar në "Fiks Fare" ku ai është regjistruar teksa fliste me shtetasin Drini Çaushi. Futbollisti është marrë në pyetje në kuadër të hetimit që inicioi policia e Tiranës...
Hamdi Salihi është dënuar me 10 ndeshje pezullim nga Komisioni i Disiplinës për shkak se në ndeshjen ndaj Kukësit i grisi kartonin e kuq kryesorit Enea Jorgji, të cilit ia mori nga dora. Reagimi i sulmuesit shkodran që njihet për qetësinë e tij erdhi pas disa vendimeve jo të drejta të kryesorit. Pamjet e ishlojtarit të Kombëtares janë komentuar shumë, ndërsa vetë shkodrani shprehet se veprimi i tij ka qenë i gabuar. Në një prononcim për "Sport News" në "News 24", ai është shprehur: "Gjesti që kam bërë ishte i dënueshëm dhe të them të drejtën e prisja një dënim nga Komisioni i Disiplinës. Duke pasur parasysh faktin se si ndodhi nuk dua që të justifikohem, por mendoj se ishte pak i ekzagjeruar si dënim, pra ishte maksimali që mund të jepej", është shprehur autori i 15 golave me fanellën e korçarëve në këtë sezon futbollistik.
KRITIKAT - Në karrierën e tij, Salihi ka luajtur si me Vllazninë ashtu edhe me Tiranën, dy skuadrat me histori në Superiore që tani duhet të luajnë fatet e mbijetesës në një ndeshje direkte mes tyre. Elis Bakaj për shkodranët dhe Gilman Lika për bardheblutë nuk kanë pranuar të jenë në fushë për shkak të ndjenjave që kanë për ekipet kundërshtare. Por, një veprim i tillë për Salihin nuk është i drejtë. "Vendimi që ka marrë Bakaj dhe G. Lika mendoj se është i gabuar, pavarësisht gjithë respektit, ose asaj që ata ndiejnë për klubet në fjalë. Kjo, pasi në radhë të parë duhet të dish të jesh profesionist dhe të luash deri në fund që të ndihmosh ekipin", ka vazhduar Salihi në prononcimin e tij të shkurtër.
LARGIMI - Salihi tashmë 33-vjeçar ka konfirmuar publikisht se nuk do të jetë më pjesë e Skënderbeut në sezonin e ardhshëm futbollistik. "Besoj se ky ishte fundi dhe më vjen keq që ndodhi kështu. Nuk do të vazhdoj të qëndroj, pavarësisht se erdha për të ndihmuar ekipin në kualifikueset e Champions League dhe kalova dy sezone të mrekullueshme me Skënderbeun dhe besoj se janë mjaftueshëm", ka mbyllur Salihi. Do mbetet për t'u parë ku do ta vazhdojë karrierën shkodrani.