Partizani, zbardhen prapaskenat për sulmin
Luçiano Moxhi ka premtuar përforcime cilësore, jo vetëm në lojtarë, por edhe staf
Partizani do të jetë sot mysafir në Korçë dhe përballja është thjesht sa për të përmbushur kalendarin. Partizani dhe Skënderbeu nuk kanë asnjë objektiv për të synuar në këtë takim. Gjithsesi, të kuqtë e kryeqytetit do të shkojnë të mobilizuar drejt Korçës, pasi duan që ta mbyllin me nder sezonin, por edhe për të treguar veten para drejtuesve, të cilët menjëherë do të nisin të mendojnë për sezonin e ri. I pranishëm në tribunën VIP të stadiumit të Korçës do të jetë edhe këshilltari më i ri i presidentit të Partizanit, ishdrejtori i Juventusit, Luçiano Moxhi. Misioni i italianit është domethënës, pasi dihet se me këtë takim mbyllet sezoni 2016- 2017 dhe menjëherë nis puna për formatimin e Partizanit të ri, që do të marrë pjesë në turin e parë paraeliminator të Ligës së Europës. Moxhi do të ketë mundësi që në këtë takim të krijojë një tjetër opinion për skuadrën dhe më pas, në bashkëpunim me drejtuesit, do të vendosen piketat e skuadrës së re. Sulmi - Partizani i sezonit të ri pritet që të ndërtohet sipas shijeve dhe direktivave të Luçiano Moxhit. Ish-drejtori i Juventusit ka premtuar se do të sjellë lojtarë cilësorë për Partizanin dhe prova e parë mbetet gjatë ballafaqimit në Europë, ku synohet që minimalisht të kalohet 2-3 ture paraeliminatore. Mësohet se sulmi do të jetë ekskluzivitet i ish- drejtorit juventin, i cili pritet të sjellë lojtarë cilësorë për këtë repart. Me shumë mundësi priten të vijnë lojtarë në huazim, sipas modelit të edicionit të fundit, "Kaleb Ekuban". Për momentin, flitet se është gjetur akordi me një sulmues uruguaian, por gjithçka do të zbardhet pas ndeshjes me Skënderbeun.
STAFI - Mbetet për t'u parë se deri ku do të shkojë puna e Moxhit, pasi, përveç lojtarëve, është përfolur se mund të ketë edhe një ripërtëritje të stafit
teknik. Gjithsesi, pas përfundimit të transfertës së Korçës, pritet një mbledhje e bordit drejtues të Partizanit, ku në bashkëpunim me këshilltarin e ri të presidentit Demi, Luçinao Moxhi, do të përcaktohet grupi që do të ruhet, si dhe lista e afrimeve në merkato.