Kamza kampione, vendos “ruleta” e penalltive
Portieri Gjonikaj bëhet hero, lushnjarët humbasin shumë raste, sulmi në ditën “jo”
Kamza shpallet kam pione e Kategorisë së Parë. Pas dy titujve të hequr padrejtësisht nga sistemi komunist, skuadra që përfaqëson qytetin në periferi të Tiranës dje ka fituar titullin pasi mundi Lushnjën. Për Kamzën është trofeu i parë që fiton në historinë e vet si klub. Një finale ku për 120 minuta prodhoi shumë raste, traversa, tension dhe spektakël, por mundoi goli. Në fund, u desh goditja e penalltive për të përcaktuar fituesin. Portieri i Kamzës, Fabio Gjonikaj, ishte pa dyshim heroi i skuadrës në finalen e djeshme. Gjatë 120 minutave shpëtoi në shumë raste portën nga gola të sigurt, në një kohë që priti edhe penalltinë e parë të Çelës duke i dhënë zemër skuadrës.
NDESHJA - Loja nis e qetë me të dyja ekipet që tregohen të kujdesshme. Rasti i parë i sfidës vjen në minutën e 36-të. Mone kroson në mënyrë perfekte në zonë nga goditja e dënimit duke nxjerrë të vetëm Xhafën shumë pranë portës, por goditja e mbrojtësit me kokë është e gabuar dhe përfundon shumë mbi traversë. Lushnjarët marrin zemër dhe një minutë më pas është Taullau që krijon hapësirën e nevojshme në qendër dhe provon nga rreth 30 metra, por topi përplaset në traversë dhe del jashtë. Pas këtyre dy momenteve zgjohet Kamza. Në të 38-ën ka një aksion perfekt të kamzalinjve. Një krosim i gjatë në mesfushë ku Malindi devijon saktë me kokë për Morinën që del i vetëm në të djathtë dhe shërben për Rezin në zonë që ka shansin më të mirë, por nuk e kontrollon topin siç duhet dhe humbet një rast ideal. Pjesa
e dytë nis me një goditje të rrezikshme të Cankës nga jashtë zone, por është Gjonikaj që grushton duke shpëtuar portën e tij nga goli. Nimani që nuk ka më shumë se një minutë në lojë dhe prek topin e parë, shpërdoron një shans të artë. Shkodrani lëviz bukur
në zonë dhe në të majtë del i vetëm përballë Spahos, por topi i goditur prej tij përfundon ngjitur me shtyllën pingule. Atëherë kur loja ishte e qetë, është Boci që ngacmon. Mbrojtësi provon një goditje nga rreth 35 metra dhe Spaho pret me vështirësi duke e lënë
topin aty pranë ku ndërhyn Morina që gjuan, por është sërish portieri lushnjar që shpëton portën e tij nga goli. 90 minutat mbyllen në barazim pa gola. Shtesa nis me një rast të pastër për Kamzën. Elmazi jep një top të gjatë për Morinën, i cili në hyrje të zonës sheh
edhe daljen e portierit Spaho dhe godet me parabol, por gabon shënjestër pasi topi përfundon jashtë. Në minutën e 108-të ka një aksion të gjatë të lushnjarëve. Çela shkon deri në fundore në të djathtë dhe kroson në zonë aty ku Canka thuajse mbi vijën fatale kthen me vështirësi në qendër për Sefën, i cili vetëm 7 metra larg portës godet, por pret mrekullisht Gjonikaj me këmbë duke shpëtuar Kamzën nga goli i sigurtë. 120 minutat nuk sjellin gol dhe shkohet te penalltitë. Nga pika e bardhë, Kamza fiton 4-3.