Maxoleni, një italian për “finalen”
Prapaskenat e operacionit “blic” të FSHF, 43-vjeçari ka njohje të vjetra me Shqipërinë
Pier Silvio Maxoleni do të jetë arbitri i ndeshjes së sotme mes Vllaznisë dhe Tiranës, që do të luhet në stadiumin "Loro Boriçi" të Shkodrës. Gjyqtari 43-vjeçar është zgjedhur në fshehtësi të plotë nga Federata Shqiptare e Futbollit, e cila është kujdesur maksimalisht që kjo të mos bëhej publike, por "Panorama Sport" ka zbuluar gjithçka. Arbitri, së bashku me dy asistentë të tij, është parë pasditen e së premtes rreth orës 16: 20 të zbarkonte në aeroportin "Nënë Tereza" në Rinas dhe nën shoqërinë e një prej zyrtarëve të FSHF-së është larguar me shpejtësi drejt kryeqytetit. Mësohet se ka qenë pikërisht institucioni i futbollit ai që ka këmbëngulur maksimalisht që arbitri të jetë italian, ndërkohë që kërkesën fillestare e pat bërë Vllaznia për arbitër të huaj. Mirëpo, çuditërisht vetë klubi shkodran doli me një qëndrim zyrtar dy ditë më parë, ku theksonte se nuk kishte kërkuar arbitra të huaj dhe se kishte besim te vendësit. Ndërkaq, nga vëzhgimi i gazetës për ndeshjet e kësaj jave në Serinë A, Pier Silvio Maxoleni nuk figuron në asnjë takim, as si kryesor dhe as i katërt. LIDHJA ME SHQIPËRINË
Maxoleni e ka nisur karrierën ndërkombëtare, duke gjykuar pikërisht një miqësore mes Shqipërisë dhe Azerbajxhanit, e luajtur më 12 nëntor të vitit 2011 dhe që përfundoi me humbjen e kuqezinjve 0- 1 në stadiumin "Qemal Stafa". Italiani njihet si një gjyqtar shumë autoritar dhe në karrierën e tij ka gjykuar rreth 165 ndeshje në Serinë A. Por, ai ka eksperiencë edhe në arenën ndërkombëtare, pasi ka arbitruar deri tani 22 ndeshje në Kupat e Europës për klube. STANDARTE
TË DYFISHTA
Federata ka vepruar me dy standarde sa u përket kërkesave për gjyqtarë të huaj. Institucioni pranoi kur Partizani luajti kundër Kukësit dhe solli sllovenin Matej Jug. Më pas, refuzoi kërkesën e klubit të Skënderbeut, që në Kukës luajti "finalen" e titullit. FSHF i besoi Enea Jorgjit dhe ky i fundit bëri atë që bëri... Tani, kur presioni është i jashtëzakonshëm, madje kalon edhe në sfera politike, federata duket se ka dashur të heqë çdo përgjegjësi nga vetja dhe ka marrë një të huaj. Madje, këtë herë nga Italia fqinje, pra jo të një niveli të dorës së dytë, sikundër ndodhi në ndeshjen Partizani-Kukësi 1-1.