Uoriors-Klivlend, finalja “klasike”
Kampionët e Kavaliers mbyllin llogaritë me Boston Sëlltiks në shifrat e përgjithshme 4-1
Për të tretin vit rad hazi do të jetë Gold en Steit Uoriors kundër Klivlend Kavaliers që do të vendosin për "unazën" e NBA- së. Me 35 pikët e shënuara nga LeBron Xhejms që i dhuruan atij edhe vendi e parë i të gjithë kohërave si pikëshënues në fazën e "play off"-it, Kavaliers mposhti Boston Sëlltiks në ndeshjen e pesë me shifrat e përgjithshme 135102 dhe mbylli serinë 4-1 të finaleve në Konferencën e Lindjes. Njëherësh formacioni i Ohajos mbron edhe titullin kampion të fituar një vit më parë. Pa histori u luajt edhe finalja e pestë e Lindjes në "TD Garden" atje ku kampionët në fuqi të NBA- së "mbytën" të zotët e shtëpisë. Lideri i kësaj mbrëmje ka qenë sërish "Mbreti", i cili shënoi 35 pikë dhe ngjitet në kuotën e 5995 pikëve në "play off" duke zbritur nga froni një legjendë të basketbollit si Majkëll Xhordan (5987 pikë). Kështu akti i tretë i "Finals" merr rrugë të premten e ardhshme. Skuadra mike e kaloi pa shumë probleme edhe këtë provë ndaj bardhejeshilëve që pa dyshim paguan shtrenjtë mungesën e liderit të tyre Isaia Tomas për shkak të një problemi shëndetësor me shpinën. Në "TD Garden" Boston e sheh veten në fundin e pjesës së parë në disavantazh 57- 75, diferencë kjo që ua bën shumë të lehtë kundërshtarëve për të mos e diskutuar më fitoren. Sëlltiks pëson kështu edhe humbjen më të thellë në historinë e saj me një diferencë prej 33 pikësh. I vetmi që "shpëtoi" nga kjo mbrëmje për vendësit ishte Averi Bredli, i cili shënoi 23 pikë. Ndërsa në shtëpinë e Klivlend festa e kualifikimit për në fazën finale është e dyfishtë pasi Xhejms, i cili, përveçse arriti finalen e shtatë radhazi në karrierë (tre tituj të fituar), shkroi historinë si pikëshënuesi më i mirë i të gjitha kohërave në "play off". "Unë luaj me numrin 23 për nder të tij, - ishin fjalët e "Të Përzgjedhurit". - Jam i dashuruar marrëzisht pas këtij sporti pikërisht falë tij. Kur e ndiqja që luante për mua ishte një Perëndi". Protagonist në fitoren e Kavaliers është gjithashtu edhe Kiri Irving, i cili shënoi 24 pikë, ndërsa Kevin Lav kontribuoi me 15 pikë dhe 11 topa në tabelë.