"Akuza të pavërteta nga zëra të dëshpëruar"
Federata Shqiptare e Volejbollit i ka quajtur spekulime pretendimet e palës shkodrane për "pengesa financiare" nga ana e FSHVsë. "Në çdo moment kemi dhënë dhe jemi të gatshëm të japim asistencën tonë pasi për ne është shumë i rëndësishëm përfaqësimi i volejbollit shqiptar në Kupat e Europës. Ditët e fundit po keqinformohet opinioni publik me dashje nga njerëz inkompetentë në lidhje me pengesat që FSHVja po u bën ekipeve për pjesëmarrjen e tyre në Europë sezonin e ardhshëm 2017-2018. Kjo nuk është aspak e vërtetë. Sqarojmë se prej disa javësh kemi informuar të gjitha skuadrat e interesuara që duan të ndërmarrin këtë hap me kushtet specifike, përfshirë këtu detyrime financiare si afatet kohore. Kushte këto që janë detyruese dhe të përcaktuara qartë në rregulloren e FIVB, CEV, BVA, FSHV që kërkon garanci financiare nga çdo ekip pjesëmarrës në Kupat e Europës. Garancia monetare që përflitet është një detyrim financiar që çdo klub në cilindo turne (Champions League, CEV Cup, Challenge Cup) do të ngrijë në bankë, shumën të cilën do ta rimarrë më pas në përmbushje të të gjitha detyrimeve të përcaktuara nga federatat e mësipërme. E përsërisim, kjo garanci financiare kërkohet nga të gjitha ekipet pjesëmarrëse në këto kompeticione pas problemeve që janë vërejtur vitet e fundit me mjaft skuadra shqiptare (Studenti etj.) që pasi konfirmojnë pjesëmarrjen, tërhiqen në momentin e fundit dhe ajo që penalizohet është jo vetëm skuadra, por edhe federata përkatëse edhe pse ky është një aktivitet për klube", thuhej në reagimin e federatës. Në përgjigje të akuzave, federata thekson se "punën e saj nuk munden ta përbaltin me akuza të pavërteta disa zëra të dëshpëruar të lidhur deri dje me interesa të ngushta personale".