Kupat e Europës, trajneri i Vllaznisë akuzon federatën
“Prej dy vitesh, nuk është mbledhur asambleja”
Nuk ka paqe mes klu bit Vllaznia dhe Federatës Shqiptare të Volejbollit edhe pas kurorëzimit historik të kuqebluve për sezonin 2016-2017. Shkak për këtë është bërë pjesëmarrja në Kupat e Europës. Mark Kroqi trajneri i kampioneve në fuqi, njëherësh shefi i klubit shumësportësh shkodran ngre shqetësimin se skuadra e tij e ka të pamundur pagesën prej 7000 eurosh si garanci financiare për një hark kohor të shkurtër të përcaktuar nga federata. Në një postim të tijin në rrjetin social "Facebook", Kroqi shprehet: "FSHVja, përmes nenit 36/1 të rregullores së saj, i kërkon SK Vllaznisë kalimin e 7 mijë eurove në llogarinë e saj deri më datë 28 maj si garanci pjesëmarrjeje në Kupat e Europës. Mënyrë më të bukur për ta përjashtuar Vllazninë nga ky eveniment nuk ka, pasi ata e dinë krejt mirë që SK Vllaznia e ka të pamundur pagesën e kësaj garancie në këtë limit kohor. Vetë procedurat administrative shtetërore kërkojnë më shumë kohë. Gjithsesi, titullin kampion nuk mund t'ia heqin qoftë edhe duke iu referuar nenit 55", shpreh indinjatën e tij trajneri Kroqi. Mes të tjerash, në denoncimin e radhës, trajneri Kroqi pretendon për parregullsi edhe në funksionimin e federatës siç është sipas tij mosmbledhja e asamblesë. "FSHV-ja e drejtuar nga sekretari part-time si dhe vllau i tij po festojnë 2-vjetorin e mosmbledhjes së Asamblesë bazuar në ligjin e UNIT. Dyshja legjendare që drejton FSHV-në sezonin e kaluar i pranoi Studentit një akt-marrëveshje pa pasur nevojë që të depozitonte 7 mijë euro në bankë, ndërsa për Vllazninë (që fitorja e titullit kampion ia ka nxirë fytyrën) nuk ia pranojnë atë duke e lënë me qëllim jashtë Kupave të Europës! Në ditët e ardhshme, do të kemi habere të reja për mënyrën se si është drejtuar dhe si drejtohet organizata FSHV nga dyshja", ironizon trajneri Kroqi në fundin e postimit në rrjetin social. Më 29 prill, Vllaznia në volejboll për meshkuj do të thyente mallkimin e titullit kampion. Pas plot 70 viteve pritjeje, kuqeblutë e rrjetës së sezonit 2016-2017 u kurorëzuan në pallatin e sportit "Asllan Rusi" kampionë të Shqipërisë për herë të parë në historinë e tyre. Vllaznia i mbylli finalet e "play off"-it 3-0 ndaj Studentit.