Borusia prish mallkimin, triumfon në kupë
Penalltia “Panenka” e yllit vendos finalen ndaj Frankfurtit
Borusia e Dortmundit e Tomas Tuhelit, pasi kishte humbur 3 finale radhazi, më në fund dërgon në shtëpi trofeun e Kupës së Gjermanisë, të katërtin në histori. Verdhezinjtë fitojnë 2-1 finalen ndaj Frankfurtit, që luajti si e barabartë absolute. Golit të Dembeles në minutën e tetë të pjesës së parë iu përgjigj ish- lojtari i Fiorentinës, Ante Rebiç në 29'. Në pjesën e dytë, pas shtyllës dhe thuajse autogolit të Fabianit, mendoi Aubamejang për t'i dhuruar fitoren Dortmundit me një penallti të fituar nga Pulisiç për një faull të Hradekit. Dhe kështu, Dortmundi, përballë 74 mijë spektatorëve të stadiumit të Berlinit, fiton edicionin numër 82 të DFBPokal dhe e mbyll sezonin me një gjysmë buzëqeshje, edhe pse në Bundesligë mund të kishte bërë shumë më tepër. Aubamejang ngjitet në kuotën e 40 golave sezonalë dhe ky mund të ketë qenë edhe goli i tij i fundit me fanellën verdhezi.
KRONIKA - Në pjesën e parë e nis menjëherë fort Dortmundi, që zhbllokohet në minutën e tetë me një gol të
bukur të Dembelesë, i cili nxjerr bosh mbrojtësin e Aintrahtit dhe mposht portierin Hradeki. Në 26' skuadra e Kovaçit tremb Borusian dhe pas 3 minutash i godet me Rebiç, i zoti që shfrytëzoi një hapësirë të lënë bosh nga mbrojtja e Tuhelit. 10 minuta
më vonë, Seferoviç godet shtyllën nga pak metra prej portës së Byrkit. Në pjesën e dytë, Dortmundi e nis me një marsh më shumë dhe i shkon pranë golit me Kagavën, por japonezi në vend që të godasë, tenton topin në qendër. Në minutën e 63-të, shtylla shmang një gol me roveshadë të Aubamejangut: Fabian shpëton në vijën fatale edhe me ndihmën e devijimit të shtyllës. Në minutën e 66-të faull naiv i Hradekit ndaj Pulisiçit në zonë. Për Ajtekin është penallti dhe Aubamejang nuk fal. Seferoviç dhe Maier sjellin kërcënimet e radhës për portën e Byrkit, përpara se Dortmundi të rrezikojë të shënojë golin e tretë me sulmuesin gabonez, por shtylla i thotë sërish "jo". Pas 5 minutash shtesë, arbitri vërshëllen fundin dhe skuadra që feston është Borusia.