Festë madhështore, Kukësi e gdhin për titullin
Mesfushori s’pranoi të udhëtonte me skuadrën në Gjirokastër
Kukësi i sezonit që sapo u mbyll e për fundoi me sukses përfaqësimin në Superiore duke arritur edhe objektivin, pasi arriti të shpallet kampion i Shqipërisë një javë para përfundimit të sezonit, pas trepikëshit të marrë në shtëpi në ndeshjen ndaj Skënderbeut. Verilindorët kërkuan të thyenin një tjetër rekord, atë të një sezoni të plotë pa asnjë humbje, por ishte Luftëtari që ia prishi rrugëtimin, pasi e mposhti në ndeshjen e fundit, e cila për skuadrën e drejtuar nga Gjoka u luajt vetëm për statistikë. RIORGANIZIMI
Tashmë një kapitull i ri pritet të hapet te skuadra verilindore, pasi kompeticioni më i madh europian për klube, Liga e Kampionëve, kërkon shumë impenjim dhe te Kukësi dihet që të merren masa për ta përballuar me sukses atë. Por, përpara se të luhet ndeshja e parë në këtë kompeticion, presidenti Gjici dhe stafi pritet të riorganizojnë klubin, duke nisur që nga drejtimi e deri te futbollistët.
TRAJNERI
Trajnerit Gjoka i ka skaduar kontrata, këtë tekniku kryeqytetas e ka shprehur publikisht në një dalje publike. Në ditët në vijim pritet që tekniku të ketë një bisedë me presidentin Gjici ku do të flitet për të ardhmen. Në rast se bisedimet rezultojnë pozitive, palët do të vazhdojnë bashkëpunimin mes tyre dhe do të hartohet edhe një plan konkret, një strategji e cila do t'i japë skuadrës sukses në Europë. Gjithashtu do të përcaktohen afrimet e lojtarëve, largimet dhe gjithçka tjetër. Por, nëse mes presidentit Gjici dhe trajnerit Gjoka nuk arrihet një gjë e tillë, atëherë do të jetë trajneri i ardhshëm që do të marrë drejtimin e skuadrës, që do të vendosë për gjithçka, në bazë të filozofisë që ka. LARGIMET
Nga Kukësi pritet të largohen shumë lojtarë, por pjesa më e madhe e tyre nuk janë titullarë. Drejtuesit kanë bërë me dije se do të ruhet boshti dhe një gjë e tillë vjen pas një urdhri që ka dhënë presidentit Gjici. Por, dilema e vetme që klubi verilindor ka është në lidhje me kohën kur këta futbollistë do të largohen. Ata janë në kontratë me klubin deri në
përfundim të Kupave të Europës dhe nuk dihet nëse do të largohen para apo pas tyre. Por, burime të besueshme të "Panorama Sport" kanë bërë me dije se Kushtrim Lushtaku tashmë nuk është më pjesë e ekipit.
Ai nuk ka pranuar të udhëtojë me skuadrën në drejtim të Gjirokastrës, pasi ishte jo i kënaqur me minutat e pakta që ka pasur në dispozicion. Në ditët në vijim futbollisti do të marrë edhe dokumentacionin për t'u larguar nga klubi.