Superiorja meriton një tjetër mundësi
Vllaznia dhe Tirana në ndeshjen midis tyre u...
Vllaznia dhe Tirana në ndeshjen midis tyre u ngjanin dy gladia torëve në Perandorinë Romake, ku "njëri prej tyre duhet të vdiste dhe njëri të fitonte lirinë e përkohshme". Trishtim dhe keqardhje pa fund për këtë përballje, prandaj, i prekur nga kjo situatë, nuk mundem të hesht. Do doja të flisja vetëm teknikisht, por në këtë gjendje atë duhet ta bëjnë drejtuesit e këtyre klubeve. Pa diskutim që kanë edhe ata mëkatet e veta për disa situata që duhet të menaxhoheshin më mirë dhe nuk duhet t'ia kalojnë përgjegjësinë dikujt tjetër. Megjithatë, edhe "armiqtë" më të mëdhenj të këtyre klubeve nuk duhet të gëzohen dhe të fërkojnë duart e të mendojnë se kanë fituar diçka. Të gjithë kanë humbur nga kjo situatë.
Ishin dy klubet e dy kryeqyteteve: Vllaznia kryeqyteti i Veriut dhe Tirana kryeqyteti i të gjithë shqiptarëve. Kam pasur nderin dhe privilegjin të jem pjesë e një klubi po aq me histori sa këto dy klube. Karriera ime dhe e çdo ish- futbollisti u ndërtua duke pasur si sfidë edhe "kundërshtarë", por asnjëherë "armik" këto klube dhe të tjera.
Ballafaqimi kundër këtyre klubeve ka shërbyer si shtysë për të punuar fort dhe për t'i sfiduar ata në fushën e lojës.
Ndeshjet kundër Tiranës, Vllaznisë, Flamurtarit, Dinamos etj., ishin si ndeshjet e Champions League sot, jo vetëm për ne si futbollistë, por për të gjithë sportdashësit shqiptarë. Kjo, për faktin se ekipet kishin në përbërje lojtarë me kualitet dhe që kishin bërë historinë e këtyre klubeve.
E thënë ndryshe, këto klube janë pasuria e gjithë shqiptarëve.
Sot jemi përballë një fakti të frikshëm. Dinamo e famshme me gjithë atë histori, me gjithë ato yje të futbollit, u shemb dhe sot nuk ka një dhomë zhveshjeje. Arsyeja? Flitet gjithçka, por hajde merre vesh...
Një gjë është e qartë: politikat e gabuara me politikanë që u ngjajnë revolucionarëve të viteve mbas çlirimit, ku arritën të plaçkitin kisha dhe xhami për të "ndërtuar Shqipërinë e re" me njerëz të rinj, me partishmëri, e shfrytëzojnë sportin për keq thjesht dhe vetëm për interesat e tyre.
E provuan me Partizanin... Me sakrifica të mëdha u kthye përsëri.
Si mund të zëvendësohen këto klube ikona me ekipe që, për vetë potencialin e pamjaftueshëm intelektual, arsimor, kulturor, sportiv, profesional, infrastrukturor të dobët dhe pa histori, mund të plotësojnë një ligë që do t'i ngjajë një fantazme pa jetë dhe pa shprese?!
Si ish- sportist dhe trajner do dëshiroja të shikohej edhe një mundësi tjetër. E kam fjalën për një formulë tjetër të Superiores, me qëllim që t'i japim futbollit tonë edhe një mundësi për të qenë më i plotësuar. Nuk është tradhti dhe askush nuk do të gjykohet nëse respektojmë dhe korrigjojmë historinë.