Pa forcë dhe moral, Tirana duhet të luajë edhe... Kupën

Tirana mund të përsërisë... Zyrihun. Zviceranët ranë nga kategoria, por në të njëjtin vit luajtën në Europë. Nëse bardheblutë kalojnë Skënderbeun në finale këtë të mërkurë, edhe ata do të jenë pjesëmarrës në Ligën e Europës. Psikologjikisht janë të dërrmuar, madje tashmë edhe këmbët komandohen prej ndjenjave. Megjithatë, ajo është një ndeshje për t'u luajtur. Ai trofe nuk ka asnjë vlerë morale për tifozët kryeqytetas, por ndoshta edhe për vetë lojtarët dhe stafin, megjithatë për klubin është e kundërta. Disa parà më tepër të arkëtuara, do t'i shërbenin ndjeshëm për të ndërtuar një ekip të fortë për të mos diskutuar ngjitjen e shpejtë në elitë, por edhe për të ruajtur identitetin në arenën ndërkombëtare.