Qyteti në këmbë, Kukësi merr trofeun
Gjici: Ndeshje miqësore në Angli për qytetarët emigrantë
Qyteti i Kukësit ka qenë dje në festë. Trofeu i titullit kampion, i fituar për herë të parë në histori nga skuadra e drejtuar prej trajnerit Gjoka, ka mbërritur në verilindje. Me një organizim në sheshin kryesor të qytetit, mes tifozëve të shumtë, presidenti i FSHF-së, Armand Duka, i ka dhënë kapitenit Hallaçi trofeun e shumëdëshiruar, ndërsa sulmuesi Pero Pejiç ka marrë "Këpucën e Artë", pasi u shpall golashënuesi më i mirë i këtij kampionati me 28 gola të shënuar. Në fakt, festa ka nisur që në orët e drekës, ku presidenti Gjici, në një nga restorantet e zonës ka shtruar një drekë për miqtë dhe dashamirësit e skuadrës. Rreth orës 18:00, kryebashkiaku Bashkim Shehu ka pritur në ambientet e institucionit që drejton të gjithë lojtarët dhe stafin teknik, duke i nderuar me Medaljen e Mirënjohjes. Më pas, këngëtarë të njohur në vend kanë pushtuar skenën deri në momentin kulminant kur trofeu ka kaluar në duart e futbollistëve, që kishin parakaluar më parë në skenën e ngritur. Pas ceremonisë me tifozët në shesh, skuadra u është drejtuar një prej restoranteve në Morinë, ku me rreth 300 të ftuar kanë vazhduar festën deri në orët e para të mëngjesit. DEKLARATA
Në fjalën e tij para tifozëve, skuadrës dhe të ftuarve, presidenti Safet Gjici ndër të tjera është shprehur: "Unë jam njeri i fjalës së mbajtur dhe ky trofe është një premtim. Dua t'i falënderoj të gjithë ata që kanë dhënë kontributin e tyre në këtë skuadër gjatë këtyre viteve, për të arritur ne sot në këtë sukses. Gjithashtu, falënderoj tifozët e Kukësit, Hasit dhe Tropojës për të gjithë mbështetjen që na kanë dhënë. Në të ardhmen kemi planifikuar të luajmë një ndeshje miqësore me një skuadër angleze, në mënyrë që tifozët kuksianë në këtë shtet të kenë mundësi ta shohin nga afër skuadrën dhe trofeun e fituar. Ndërsa unë, pavarësisht obligimeve në të ardhmen, do të jem gjithmonë pranë skuadrës, për të dhënë kontributin tim ashtu siç kam bërë deri më tani", ka përfunduar Gjici.