Leksion nga Ruço: Gjuaj si Ozil, goli i sigurt
Mbrojtësi lushnjar shënoi me penallti në finalen me Kamzën, kërkon falje për tifozët
Penalltitë i kanë mohuar Lushnjës titullin kampion të Kategorisë së Parë, por skuadra verdhejeshile ka mbetur nën entuziazmin e ngjitjes në Superiore. Për herë të dytë Lushnja kalon në elitë jo si fituese e kampionatit të inferiorëve, por si finaliste. Në këtë mënyrë lushnjarët u ngjitën edhe në fund të sezonit 1979-1980. Skuadra verdhejeshile që atëherë drejtohej nga Kristaq Gogoni humbi finalen me Besëlidhjen dhe u ngjit në elitë si fituese e grupit A. Ndaj Kamzës lushnjarët nuk kanë mundur dot të shënojnë në 120 minuta lojë dhe janë ndëshkuar në serialin e pesë penalltive. Futbollisti i linjës së majtë Ledion Ruço shprehet: "Jemi përpjekur që ta fitonim këtë trofe sidomos për tifozët tanë që na mbështetën për tri orë rresht. Na erdhi shumë keq që nuk arritëm. Por, ne kemi entuziazmin që kaluam në elitë pas një sezoni të mrekullueshëm", tha fillimisht Ruço. I pyetur për penalltinë që ekzekutoi në finale duke shënuar, mbrojtësi tha: "Unë e gjuaj në stilin 'Ozil' dhe e kam përvetësuar më së miri". Futbollisti 25-vjeçar ishte nga më të mirët e Lushnjës në këtë sezon. Ideja - Kapllan Pepa, një nga ishfutbollistët më të njohur të Lushnjës, në një prononcim për gazetën "Panorama Sport" u shpreh: "Titulli i kampionatit nuk mund të jepet duke shndërruar sistemin e kampionatit në sistem kupe. Derisa ka shtesë dhe penallti, kemi shndërruar sistemin e kampionatit në sistem kupe. Kjo është e papranueshme. Skuadrat do të bënin një finale titulli, por duhej të merreshin në kon- sideratë pikët e tyre në grupe. Derisa Lushnja kishte më shumë pikë në grupe, 41 nga 40 të Kamzës, barazimi në 90 minuta duhej t'i jepte titullin. Kjo ishte një finale për kampionatin. Përveç skemave të dështuara të kampionatit, mendoj se për të rritur cilësinë, FSHF-ja duhet të aplikojë normat, që çdo lojtar të ketë parametrat atletikë dhe fizikë". Alban Alushi