Mesi, ultimatum drejtuesve, kërkon Dibalën te Barcelona
Lionel Mesi dhe Paulo Dibala nuk humbin rast që t'i lëshojnë njëri-tjetrit komplimente në distancë dhe me sa duket, deklarata e fundit e juventinit e ka prekur argjentinasin e katalanasve: "Unë nuk dua që të krahasohem me Mesin, dua të luaj përkrah Mesit. Nuk dua t'i zë vendin tek Argjentina, dua të fitoj së bashku me të në kombëtare". Dhe nga Spanja nënvizojnë se mesazhi ka ardhur i qartë, madje me vetë "Pleshtin", i cili kërkon që të ndajë fushën e lojës me 23-vjeçarin edhe në rang klubi tashmë. Sipas revistës "Don Balon", pas fundit të këtij sezoni jo shumë pozitiv për ta, Lionel Mesi u ka kërkuar drejtuesve përforcime të rëndësishme për sezonin e ardhshëm dhe kushti i parë që numri 10 i ka vënë presidentit Josep Maria Bartomeu është pikërisht bashkatdhetari i tij, Paulo Dibala, madje duke këmbëngulur që ata të paguajnë çfarëdo shifre për atë që shihet si pasardhësi i tij.