Luftëtari nis pushimet, Zguro është largimi i parë
Milinkoviç: Nuk e kam problem të vazhdoj sërish këtu
Në pritje të finales së Kupës së Shqipërisë mes Skënderbeut dhe Tiranës, futbollistët gjirokastritë dhe stafi teknik nga dje do të shijojnë suksesin e vendit të katërt. Për të arritur në këtë fundsezoni, Luftëtarit i është dashur të sfidojë kundërshtarë të rëndësishëm, të cilët e shihnin skuadrën bluzi si kalimtare e këtij kompeticioni. Në një kohë që e gjithë vëmendja është përqendruar në finalen e Kupës së të mërkurës, edhe futbollistët janë larguar drejt familjeve për të shijuar pushimet. Skuadra do të qëndrojë pushim deri më 9 qershor. Ndërkaq, largimi i parë nga skuadra pritet të jetë mbrojtësi i majtë Vangjel Zguro. Ai ka udhëtuar së bashku me familjen drejt Amerikës dhe, sipas të gjitha gjasave, nuk do të rikthehet më në Shqipëri.
Milinkoviç
Trajneri Mlladen Milinkoviç ka shijuar për disa orë festën e Luftëtarit për mbylljen e sezonit në mënyrë perfekte dhe, më pas, ka udhëtuar drejt vendlindjes së tij, Serbi. Pas takimit të fundit me Kukësin, trajneri serb deklaroi: "Këtë arritje ua dedikoj të gjithë futbollistëve, të cilët për gati një vit kanë ditur të sfidojnë shumë faktorë. Ndeshjet e fazës së parë pa dyshim që janë arritje për ne, pasi të gjitha i kemi luajtur në fusha asnjanëse. Me përkushtim, seriozitet dhe mbështetjen e presidentit Vangjel Tavo ia dolëm të arrinim këtë sukses që, pakkush e kishte pritur në fillim të sezonit. Gjithashtu, dua të them se kam kaluar pothuajse një vit të plotë në Gjirokastër dhe se ndihem shumë mirë. Jo vetëm këtu, por kudo ku kemi luajtur njerëzit më kanë pritur mirë dhe ndihem i vlerësuar për këtë. Jam ndier kudo i respektuar dhe nuk e kam problem të vazhdoj të jem sërish në këtë shtet, në këtë vend", tha Milinkoviç. Tomor Shehu