Kukësi u bëri ftesë, por klubet e Superiores e refuzuan
Në darkën e titullit morën pjesë vetëm zyrtarët e FSHF-së
E diela ka qenë ditë feste në Kukës, pasi qyteti ka pritur dhe respektuar protagonistët e suksesit historik, ata që fituan titullin e parë kampion. Drejtuesit verilindorë u treguan zemërgjerë dhe mjaft të respektueshëm në momentin kur u bënë ftesë të gjithë trajnerëve dhe presidentëve të klubeve homologe për të festuar së bashku me Kukësin festën e titullit. Por ata nuk e morën pas atë respekt të treguar, pasi asnjë prej trajnerëve apo presidentëve nuk iu përgjigj ftesës duke mos marrë pjesë në darkën festive. Arsyet? Ato janë nga më të ndryshmet, duke filluar që nga "mëria" e rivalëve e deri te largësia dhe orari i vonë. Por kjo nuk vlejti për homologët e presidentit Gjici dhe miqtë nga Kosova. Prezent ishte presidenti i klubit të Lirisë së Prizrenit, Mirsad Çollaku, i cili si mik i verilindorëve
dhe i vetë presidentit, iu përgjigj pozitivisht thirrjes së Kukësit. Ndonëse ftesa e tyre u refuzua pasivisht nga klubet vendase, verilindorët nuk u mërzitën shumë nga ky fakt, madje ka qenë numri një i klubit, Safet Gjici, i cili ka bërë batuta me drejtues të Federatës
Shqiptare të Futbollit. Me të qeshur Gjici u ka thënë zyrtarëve të federatës: "Ç'të bëj unë?! Unë i ftoj, ata nuk vijnë. Kanë frikë nga Kukësi edhe jashtë fushe". Pas festimeve në sheshin e qytetit dhe vlerësimeve dhe stimujve të marrë në bashkinë e Kukësit, rreth orës
22:30 protagonistët kryesore u spostuan në një restorant. Kukësi kishte rreth 300 të ftuar në restorant për darkën, por afërsisht 70 veta nuk ishin prezentë. Te ky grup bënin pjesë përfaqësuesit e klubeve të ndryshme shqiptare, që nuk iu përgjigjën festës së presidentit Safet Gjici. Vendet bosh u zunë nga njerëz të tjerë, që gjysma ishin të ftuar të mëvonshëm e gjysma të paftuar. Të detyruar, drejtuesit verilindorë, si organizatorë nuk mund të ngrinin nga tavolina dhe të paftuarit që u shtuan shumë në numër gjatë orëve të vona, të cilët ishin "fitimtarët" e darkës. Darka zgjati deri në orën 03:00, ku futbollistët e Kukësit u larguan rreth orës 02:00, ndërsa pjesa e të ftuarve vazhdoi. Shumica e futbollistëve kishin marrë familjarë të tyre si shoqërues. Skerdilaid Sulozeqi