Etika shtyn vendimin, qetësohen te Skënderbeu
Dy orë mbledhje, por klubi korçar do regjistrohet në Europë
Skënderbeu merr frymë lirisht për... momentin. 24 orë para finales së Kupës së Shqipërisë, Komisioni i Etikës në FSHF nuk mori një vendim konkret për çështjen e klubit korçar, që në edicionin e kaluar u dënua me një vit mospjesëmarrje në Kupa e Europës. Etika kishte paralajmëruar dje një mbledhje, për të shqyrtuar vendimin e lënë në fuqi edhe nga KAS-i i Lozanës, teksa mendohej se Skënderbeu rrezikonte një tjetër dënim, këtë herë nga organi juridik i FSHF-së. Por, nuk do të ketë një vendim të shpejtë ashtu siç parashikohej dhe gjithçka duket se është lënë për mbledhjen e 8 qershorit. "Komisioni i Etikës ka administruar provat dhe ka diskutuar për çështjen në tërësi, atë të dosjes 'Skënderbeu'. Hetimi për këtë çështje vijon dhe data e mbledhjes së radhës, e vendosur nga anëtarët e këtij komisioni është 8 qershori", citohej dje në njoftimin e zyrës për shtyp të FSHF-së. PRAPASKENAT
Shtyrja e vendimit të Etikës i mundëson Skënderbeut regjistrimin në Ligën e Europës, pasi FSHF është e detyruar të dërgojë në UEFA emrin e klubit korçar, që ka fituar të drejtën sportive për t'u përfaqësuar në këtë kompeticion në sezonin 2017- 2018. Sportivisht këtë të drejtë bardhekuqtë e kanë përfituar si vend i tretë i kampionatit dhe këtu nuk ka lidhje finalja e Kupës, mirëpo UEFA kërkon nga federatat që deri më 1 qershor të konfirmojë skuadrat që janë kualifikuar. Një nga variantet e përfolura më së shumti gjatë ditëve të fundit për një vendim të mundshëm nga Etika ishte rrëzimi i Skënderbeut nga Kategoria Superiore, që do t'i hiqte njëkohësisht edhe mundësinë për t'u përfaqësuar në Europë. Kësisoj, kjo shtyrje të lë të kuptosh se nuk do të ketë një dënim të rëndë për Skënderbeun. Sipas UEFA-s, klubi korçar dyshohet se ka manipuluar rezultatet e disa ndeshjeve, jo vetëm në Kupat e Europës, por edhe në kampionatin shqiptar gjatë viteve të kaluara. Tashmë mbetet për t'u parë se çfarë do të ndodhë më 8 qershor, në një kohë që varianti më i besueshëm për momentin duket një zbritje e pikëve për sezonin e ardhshëm. Nga dënimi i mundshëm i Skënderbeut kanë shpresuar shumë edhe te Tirana, duke menduar se zbritja e tyre nga Superiorja do t'i rikthente bardheblutë në elitë. Mirëpo, ky variant duket se ka rënë përfundimisht poshtë.