Nisin piketimet e para për përforcimet e merkatos

Përfundimi i sezonit futbollistik dha një verdikt aspak të këndshëm për Apoloninë. Skuadra fierake zhvilloi një kampionat me oshilacione dhe doli shumë shpejt nga objektivat e saj për t'u ngjitur në elitë. Përkundrazi, në gjysmën e rrugës ajo u rendit në grupin e skuadrave që do të luftonin për mbijetesë. Megjithatë, tashmë gjithçka ka mbetur prapa dhe fieraket po mendojnë për sezonin e ri, ku objektivi i tyre i vetëm do të jetë sërish ngjitja në Kategorinë Superiore. Fierakët kanë një skuadër me lojtarë të rinj, të cilët e kanë shfrytëzuar sezonin e shkuar për të fituar eksperiencë dhe tanimë e njohin mirë lojën e njëri-tjetrit. Edhe pse ka kohë të mjaftueshme deri në fillimin e sezonit të ri, stafi i skuadrës u bën apel drejtuesve të klubit që, nëse kanë në plane të përforcojnë ekipin aktual për ta bërë sa më kompetitiv, të nisin që në këto momente nga puna. Kjo, për të afruar, dhe në bazë të strategjisë që po aplikohet, lojtarët e duhur e cilësorë që të bëjnë diferencën. Një gjë e tillë do të shmangte afrimin në ekip të lojtarëve, të cilët nuk kanë gjetur hapësira në skuadra të tjera dhe më pas bëhen pjesë e fierakëve. Burime pranë klubit kanë bërë me dije se drejtuesit kanë vendosur piketat për sezonin e ri dhe duan që të marrin lojtarë, të cilët do të bëjnë diferencën. Pritet që strategjia të jetë e njëjtë dhe të afrohen ata futbollistë që do të jenë në moshë të re. Një gjë e tillë do t'i bëjë fierakët konkurrues dhe në garë për të siguruar një vend në Superiore sezonin e ardhshëm. Mikel Mbriçaj