"Nuk jam gati për finalen, Isko ka qenë fenomenal"
Garet Bejl ka njoftuar se nuk është gati për finalen e Ligës së Kampioneve, duke nënkuptuar se nuk do jetë në formacion. Uellsiani s'ia ka dalë që të riaftësohet 100% nga dëmtimi, por do jetë një alternativë e rëndësishme për t'u futur si zëvendësues. Më tej, sulmuesi ka thurur elozhe për Iskon, duke e konsideruar si një nga arsyet që Reali ka arritur deri këtu... RIAFTËSIMI - "Jo, nuk jam në 100% të formës sime. Kam luajtur me dhimbje, por besoj se deri në finale do jem në 90%. Kam punuar shumë gjatë kësaj periudhe, me dy seanca në ditë dhe kjo më ka ndihmuar".
MOMENT I VËSHTIRË - "Pa diskutim, pasi kam qëndruar jashtë fushave në një periudhë të rëndësishme të sezonit. Jam munduar të ndihmoj skuadrën sa më tepër, por kam qenë i pafat. Familja më ka qëndruar pranë, ndonëse kam qenë në vështirësi si fizikisht, ashtu edhe psikologjikisht. Më e rëndësishmja është që tani e kalova". FORMACIONI - "Nëse ma kërkon trajneri, pa diskutim që do luaj nga minuta e parë. Por, e shikoj të vështirë që të qëndroj në fushë për 90 minuta. Nuk kam luajtur aspak që prej operacionit dhe Isko ka qenë në një formë fenomenale. Gjithsesi, e vendos Zidan dhe ai do hedhë në fushë lojtarët që mendon se do fitojnë kundër Juventusit. Unë nuk do zhgënjehesha po të qëndrojë në pankinë, pavarësisht se luhet në vendlindjen time". ISKO - "Ka qenë i jashtëzakonshëm. Një nga arsyet që Reali nuk bëri asnjë hap fals në garën për titull dhe siguroi pjesëmarrjen në finalen e Champions-it është pa diskutim ai. Ka bërë diferencën në çdo takim. Ka një kualitet të rrallë". KARDIFI - "Për mua është si një ëndërr që do luaj një ndeshje kaq të rëndësishme në qytetin ku kam lindur. Por, nuk dua të kënaqem vetëm me pjesëmarrjen. Ka për të qenë një festë e paharrueshme për mua që ta ngre pikërisht trofeun aty. Fati më dha mundësinë dhe nuk dua ta shpërdoroj. Kam besim tek të gjithë shokët e ekipit që së bashku do ia dalim". JUVENTUSI - "Janë shumë të fortë në mbrojtje dhe njëkohësisht kanë futbollistë shumë cilësorë në sulm. Ka për të qenë mjaft e vështirë. Na duhet të japim patjetër maksimumin, për të pasur shanse që të triumfojmë. Jemi të vetëdijshëm për atë që na pret dhe e dimë se çfarë nevojitet në fushë.
SEKRETI - "Nuk ka asnjë sekret që të drejton te fitorja. Thjesht duhet të punosh shumë dhe të gabosh pak".