“Zonja”, më e freskët se Reali

Finalja e Ligës së Kampionëve është një ndeshje që vendoset nga detajet dhe sigurisht që njëri prej tyre mund të jetë freskia e të dyja ekipeve që zbresin në fushën e lojës. Nëse do të ishte faktori i vetëm që përcaktonte këtë ndeshje, sigurisht që do të triumfonte Juventusi. Kjo për faktin se Masimiliano Alegri ka arritur të bëjë rrotacionet në mënyrë perfekte dhe ka arritur të ndërtojë një ekip, ku mund të luajnë të gjithë. Pavarësisht faktit se bardhezinjtë kanë qenë të detyruar të luajnë më shumë ndeshje në Kupë, Reali ka qenë i impenjuar në Botërorin e Klubeve dhe në Superkupën e Europës. Në total, lojtarët e Juventusit kanë arritur të grumbullojnë 471 ndeshje, të përkthyera në minuta: 36.905. Ndërkohë, "galaktikët" e Realit të Madridit kanë 468 ndeshje, të cilat në minuta përkthehen 38.069. Diferenca është 1.164 minuta, por interesant është fakti që lojtari më i aktivizuar nga të dyja skuadrat është sulmuesi i Juventusit, Gonzalo Higuain, i cili gjatë këtij viti ka akumuluar 4396 minuta duke qenë një nga liderët e skuadrës bardhezi drejt triumfeve në kampionat dhe Kupë. Në radhët e Realit të Madridit, futbollisti më i aktivizuar është Toni Kros. Ylli gjerman numëron 4081 minuta të luajtura gjatë këtij sezoni, ndërsa pas tij renditet Ronaldo me 4.36 minuta të luajtura. Sekreti më i madh i Juventusit është aktivizimi i mbrojtësve si Benatia, Azamoah dhe Lihshtajner në Serinë A, ndërkohë që Zidan shpeshherë ka qenë i detyruar të luajë me të njëjtët futbollistë për shkak të dëmtimeve që pësuan lojtarët si Bejl, Kros, Modriç. Pavarësisht se në Spanjë, rrotacioni i Zizusë shihej si një arsye e fitores së titullit, duket se në duelin me Juventusin është i humbur.