Tirana fiton Kupën “e çudirave”
Finalen e vendosin tre afrikanë, korçarët zhgënjejnë dhe i japin një dorë ekipit të Josës
Tirana fiton Kupën "e çudirave" ndaj një Skënderbeu të lexueshëm, me tre afrikanë që vulosin trofeun e 16-të në historinë e klubit bardheblu. 120 minuta, katër gola dhe shumë zhgënjim. Ishte një Kupë si ngushëllim për kryeqytetasit pas rënies nga Kategoria Superiore për herë të parë. Ndoshta kënaqësia e vetme mund të jetë kalimi i rivalit të përjetshëm, Partizanit edhe sa i përket trofeut të kompeticionit të dytë më të rëndësishëm në vend. Rekordit me 24 tituj, bardhebluve iu shtohet edhe rekordi me 16 Kupa, duke lënë pas në këtë mënyrë të kuqtë me 15. Ishte Kupa "e çudirave", edhe për atë që ndodhi në "Elbasan Arena" me tifozët e Tiranës. Rikthimi i ultrasve bardheblu pas gjashtë muajsh përkoi me një protestë kundër presidentit Refik Halili, por çudia u bë më e madhe kur autori i golit të parë, sulmuesi Ifeani Edeh, kërkoi të ndante gëzimin me "Tirona Fanatics". Këta të fundit u irrituan më shumë dhe menjëherë braktisën stadiumin. Një situatë surreale, por që nuk e kishte fundin këtu. Afër fundit të lojës, në stadium rezultonte të kishte më shumë policë sesa tifozë, pasi edhe ata korçarë nuk e duruan dot shfaqjen e ekipit të tyre dhe u larguan. Por, sikur të mos mjaftonte kjo, te Tirana e kishin të vështirë të festonin me trofeun, duke filluar nga trajneri Josa që refuzoi të merrte medaljen, deri te kapiteni Karabeci, që me zor e ngriti Kupën, duke u ndihmuar nga sekretari i përgjithshëm i FSHF-së, Ilir Shulku. 24 orë para finales, presidenti i FSHF-së, Armand Duka, deklaroi se shpresonte që Tirana të fitonte Kupën si Zyrihu në Zvicër, që zbriti nga Superliga dhe më pas luajti në grupet e Ligës së Europës. E megjithatë, Duka nuk denjoi që dje t'i dorëzonte trofeun Tiranës, duke munguar në finale si asnjëherë tjetër. Si për ironi të atyre që kanë ndodhur në këtë sezon, tashmë Superkupa e Shqipërisë do të jetë Kukësi-Tirana, "çifti" që prodhoi nga të gjitha gjatë këtij viti.
90 MINUTAT - Josa kishte "dënuar" golashënuesin më të mirë, Afrim Taku, duke e ulur në stol, ndërsa Daja ishte i detyruar për të bërë lëvizje, pasi mungesave të Salihit, Osmanit dhe Lilajt, i shtohej para ndeshjes edhe Orelesi. Nimaga bënte rolin e shkatërruesit, ndërsa sulmi i besohet Plakut. Minutat e para janë të zbehta dhe tentativat e Muzakës e
Xhejmsit nuk e shqetësojnë aspak Ilion Likën. Megjithatë, mjafton një gafë e mbrojtjes korçare me Radasin dhe Jashanicën të hutuar, që Edeh të dalë i vetëm me Shehin dhe të shënojë. Tirana është më e vendosur në fushë përballë një Skënderbeu që ka shumë forca sulmuese, por me lojtarë që e teprojnë me mbajtjen e topit.
Talenti i bardhebluve, Albi Doka, i jep një tjetër leksion Liridon Latifit, duke e sfumuar totalisht. Megjithatë, kosovari ka një rast të artë për të barazuar pas asistit të Vangjelit, por shpërdoron. Pas 25 minutave të para "fjalën" e merr Ilion Lika. Portieri bardheblu bën heroin në të paktën katër raste, duke evituar gola të sigurtë.
Plaku është në një ditë "jo", ndërsa Nimaga nuk u beson syve vetëm pesë metra larg portës. Pjesa e parë mbyllet 0-1 për Tiranën, ndërsa e dyta nis me një marsh tjetër për Skënderbeun, por aksionet e korçarëve janë shumë të lexueshme. Për afro 35 minuta skuadrat nuk prodhojnë asnjë rast ideal. Kur dukej se gjithçka do të mbyllej me fitoren e bardhebluve, Radas hedh një top të gjatë në zonë, që shkon direkt në rrjetë. Gjithçka shkon në shtesë.
SHTESAT - Tirana është më e freskët, ndërsa Skënderbeu duket më i lodhur se kurrë. Nga ana tjetër, Daja dhe Josa nuk bëjnë dot asnjë zëvendësim, pasi i kishin konsumuar brenda 90 minutave.
Megjithatë, një gafë në dalje e portierit Shehi sjell golin e dytë, që shënohet nga Moise. Skënderbeu duket i dorëzuar, ndërsa Tirana bëhet me krahë dhe kërkon të mbyllë gjithçka. Nuk kalojnë shumë minuta dhe mesfushori Daja fiton një penallti pas pengimit në zonë nga Jashanica. Nga pika e bardhë është Merveil që nuk fal, duke vulosur fitoren 3-1 në Kupën e 16-të të Tiranës. Për Skënderbeun vijon makthi i këtij kompeticioni të snobuar në gjashtë vitet e arta, ku u morën po kaq tituj radhazi. Pesë herë në finale dhe asnjëherë triumfues, korçarët mbyllën një sezon zhgënjyes, ndërsa ankthi vazhdon, pasi më 8 qershor presin... Etikën.