Kamza e shpërndarë, lojtarët presin rrogat dhe premiot

Lojtarët e Kamzës janë shpërndarë pas fitimit të finales së Kategorisë së Parë dhe presin të mësojnë planet e klubit për sezonin e ri në Superiore. "Panorama Sport" mëson se pjesa dërrmuese e lojtarëve do të jenë në planet e klubit edhe për sezonin e ardhshëm, por për momentin nuk mund të flitet me siguri për asgjë. Fakt është që futbollistët presin të shlyhen me rrogën e fundit dhe të marrin premion e premtuar nga Bashkia e Kamzës. Vlen të theksohet se Kamza do të marrë nga FSHF 30 milionë lekë të vjetër si shpërblim për fitimin e titullit. Ndërkohë, pjesa më e rëndësishme është ajo e plotësimit të kritereve për infrastrukturën. Siç dihet, dy ditë më parë zyrtarë të lartë të institucionit të futbollit shqiptar inspektuan stadiumin e Kamzës, duke lënë detyra konkrete, në mënyrë që të plotësohen kushtet e licencimit. Fusha do të rinovohet krejtësisht, por punime do të kryhen edhe në dhomat e zhveshjes dhe tribunat. Gjithashtu, klubi duhet të plotësojë edhe kushtet që kërkon platforma televizive që transmeton direkt ndeshjet e Superiores. Tri kulla transmetimi pritet të vendosen në pjesën e tribunës qendrore, në mënyrë që media të ketë kushtet e duhura. Do të krijohet edhe një sektor i veçantë për gazetarët. "Kemi bërë një inspektim në Kamzë, teksa fusha është në kushte të papranueshme, ndërsa edhe stadiumi duhet rikonstruktuar. Ka shumë probleme, por shpresoj që Kamza të plotësojë kriteret. Kemi bërë një marrëveshje me bashkinë dhe FSHF do të investojë për fushën. Gjithsesi, klubi duhet të investojnë në ambientet e brendshme. Afati maksimal i plotësimit të kushteve është mesi i muajit korrik. Klubet që nuk plotësojnë kriterin e infrastrukturës, duhet të gjejnë një marrëveshje me një stadium tjetër", ka thënë specialisti i licencimit në FSHF, Eduard Gjini, i pyetur për situatën në stadiumin e Kamzës. Klubi i sapongjitur në Superiore është tashmë në luftë me kohën për stadiumin. A.Dushku