Vllaznia kampione, Partizani thyhet te penalltitë
Mesfushori Hepaj: Ndihem mirë në Lezhë, na penalizoi gjykimi që nuk kapëm elitën
Futbollistët e Besëlidhjes vijojnë pushimet verore që pritet të mbyllen me ftesën e presidentit për t'u grumbulluar për të startuar fazën përgatitore. Kampionati i ardhshëm do të jetë i 10-ti, ku lezhjanët do të garojnë në Kategorinë e Parë. Sezoni që përfundoi për skuadrën rezultoi sërish i dështuar për sa i përket objektivit kryesor, ngjitjes në elitë. Besëlidhja nuk arriti ta realizonte këtë synim, por surprizoi në Kupën e Shqipërisë. Lezhjanët shkuan deri në gjysmëfinalet e Kupës, duke eliminuar Partizanin dhe Flamurtarin. Megjithatë, për ekipin nuk ka ndryshuar asgjë, pasi do të luajë sërish në të Parën. Shumë nga futbollistët janë nën kontratë, por deklaratat e presidentit të bëra publike para disa ditësh për ndryshime në ekip i kanë vënë në lëvizje shumë futbollistë. Disa lojtarë që para mbylljes së sezonit kanë pasur oferta, por ende nuk janë të vendosur se si do të veprojnë. HEPAJ
Mesfushori Samet Hepaj me fanellën e Besëlidhjes mbylli sezonin e dytë dhe është ende nën kontratë me skuadrën lezhjane. Gjatë sezonit që lamë pas ka pasur oferta të leverdishme, madje edhe nga skuadrat e Superiores, por ka preferuar më mirë të vijojë karrierën në Lezhë. Këtë e shpreh edhe në prononcimin e tij për gazetën "Panorama Sport". "Me Besëlidhjen e kam ndier veten shumë mirë, pasi është një skuadër që ia vlen ta mbash veshur fanellën e saj. Unë këtu mbylla dy sezone, ku kampionati i fundit për ne ishte deri diku i suksesshëm, por barazimi në Kamzë na detyroi që edhe sezonin tjetër të luajmë në të Parën. Nuk është vetëm faji ynë për këtë dështim, por janë edhe faktorë të tjerë që fatkeqësisht në Shqipëri po e dëmtojnë rëndë futbollin. Është fjala për gjykimin dhe kjo u pa fare qartë edhe në
sfidat e fundit të Superiores. Shembulli më i qartë është krahasimi i takimit Vllaznia- Tirana, ku tiranasit ranë një kategori më poshtë, ku u gjykua nga italianë dhe nuk pati asnjë kontestim nga të gjitha palët. Ndërsa në të tjerat që u gjykuan nga shqiptarët, u luajt vetëm teatër e jo futboll", tha mesfushori shkodran i Besëlidhjes, Samet Hepaj. Pritet që edhe kampionatin tjetër, Besëlidhja të jetë sërish pretendente për t'u ngjitur në Superiore. Gjok Noka po mendon ndërtimin e një skuadre cilësore për vitin tjetër.