Arrestohet Leal, Idrizi: Ishte pa patentë, nuk është kriminel
“Nuk na u la kohë që të fotokopjonim dokumentin”
Mauricio Leal është arrestuar nga Policia e Vlorës. Ngjarja ka ndodhur paraditen e djeshme në Radhimë. Futbollisti brazilian i Flamurtarit drejtonte një automjet "Benz", ndërsa ka qenë i shoqëruar edhe nga dy bashkëkombësit e tij, Lukas Kanixha dhe Nakamuta Lineker. Por në automjet ishin pesë vetë. Burimet bëjnë me dije për "Panorama Sport" se tre lojtarët e Flamurtarit kanë marrë në automjetin e tyre edhe dy studentë shqiptarë të rastësishëm, të cilët u kanë kërkuar të shkonin deri në Vlorë. E ndërsa po ktheheshin nga plazhi, në Radhimë, policia rrugore u ka kërkuar që të ndalonin, por Leal nuk i është bindur urdhrit të uniformave blu dhe është larguar me automjetin e tij. Policia është vënë në ndjekje të tyre, duke i ndaluar disa metra më poshtë. Pasi i ka ushtruar automjetit kontroll, policia ka shoqëruar në komisariat drejtuesin e mjetit, futbollistin Leal, i cili nuk ka pasur as patentën me vete.
DEKLARATA E POLICISË - Menjëherë pas arrestimit të futbollistit të Flamurtarit, Mauricio Leal, Policia e Vlorës ka dalë me një komunikatë për shtyp, shpërndarë mediave, ku i ka informuar për ngjarjen e ndodhur. "Policia ka arrestuar në flagrancë shtetasin: Mauricio Leal, 30 vjeç, lindur në Brazil, banues në Vlorë. Policia ka bërë arrestimin e tij në Radhimë, pasi ky shtetas po drejtonte mjetin tip ' Benz', pa leje drejtimi përkatëse dhe duke udhëtuar në këto kushte nuk i është bindur urdhrit të punonjësit të policisë rrugore për të ndaluar. Materialet iu referuan prokurorisë për veprën penale
'drejtimi i automjetit në mënyrë të parregullt' dhe ' mosbindja ndaj urdhrit të punonjësit të policisë së rendit publik', të parashikuara nga nenet 291 dhe 242 të Kodit Penal", thuhet në komunikatën e Policisë.
REAGON IDRIZI -
Administratori
i Flamurtarit, Sinan Idrizi, e cilëson të ekzagjeruar arrestimin nga policia të futbollistit brazilian Mauricio Leal. Idrizi thotë se ka bashkëpunuar ne policinë dhe nuk e meritonte një veprim të tillë. "Unë jam për zbatimin e ligjit, por jo kështu.
Unë nuk them të shkelet ligji, por ndalimi i futbollistit tonë në këtë mënyrë është shumë i nxituar. Futbollistët nuk ishin të dehur, thjesht nuk ndaluan. Unë e kuptoj që ata kanë bërë gabim që nuk kanë ndaluar, por ja që ndodhi. Leal u kap pa patentë, por
nuk na lanë kohë që patentën e fotokopjuar t'ua vendosnim në dispozicion. Unë kam qenë korrekt me policinë. Ata janë të huaj dhe policia duhet që t'i mirëkuptonte. Unë mbi ligjin nuk dal, por është nxituar me arrestimin e Leal", u shpreh Idrizi në prononcimin e tij për "Panorama Sport, duke mbështetur futbollistët e tij në këtë rast. Pritet që Leal në ditët në vijim të marrë edhe masën e sigurisë për atë që ka ndodhur, por sipas të gjitha gjasave ai do të hetohet nga organet e gjyqësorit në gjendje të lirë.