‘Gol’ me Lenjani-Shehi, mungojnë dy sulmuesit
Cikalleshi dhe Sadiku luajnë sot, portieri la futbollin
Lista për dy ndeshjet e radhës e përzgjedhur nga trajneri De Biazi, është, në mos jo më e mira e mundshme, të paktën kontradiktore me vetë fjalët që tekniku ka shprehur herë të tjera në konferencat për mediat. Në listën me lojtarët e grumbulluar për ndeshjen me Luksemburgun dhe Izraelin është përfshirë Ermir Lenjani dhe Orges Shehi. I pari, rikthim në Kombëtare pa asnjë minutë në vitin 2017, ndërsa i dyti përfshihet, edhe pse ka përmendur largimin nga futbolli i luajtur. Gjithashtu, këtë herë është përfshirë në listë edhe Andi Lila, që aktualisht nuk ka skuadër, apo edhe Arlind Ajeti, i cili nuk është aktivizuar prej muajsh te Torino. Portieri, vetëm një ditë më parë pas finales së Kupës së Shqipërisë, deklaroi se po mendon tërheqjen nga futbolli i luajtur.
MESFUSHORI - Renes është sjellë ekstremisht keq me mesfushorin shqiptar, por duket se këtë pjesë po mundohet ta balancojë trajneri i Kombëtares shqiptare. Xhani De Biazi ka ftuar në ekip shqiptarin, i cili gjatë gjysmës së dytë të këtij sezoni nuk ka zbritur në fushë për asnjë minutë. Lenjani është aktivizuar me
skuadrën e parë dhe të dytë të Renesit në total 185 minuta, në katër ndeshje gjithsesi në muajit gusht, shtator dhe tetor. Një zgjedhje, të cilës trajneri mund t'i jepte një arsyetim në rast se do të kishte dalë përpara mediave, për të shpjeguar praninë e futbollistit që i dha
shumë Kombëtares në edicionin kualifikues për në Europian, por që është i penalizuar nga skuadra në të cilën ka qenë këtë sezon në Francë.
SULMUESIT - Për ndeshjen e parë miqësore, trajneri De Biazi mund të mos ketë asnjë sulmues "pykë". Kjo për vetë faktin se ai ka ftuar vetëm dy, por edhe Sokol Cikalleshi, por edhe Armando Sadiku do të jenë sot të angazhuar me skuadrat e tyre respektive në Turqi dhe në Zvicër. Të dy lojtarët janë pjesë e rëndësishme e Ahskisarit dhe e Luganos, ndaj nuk mund të mungonin në këto dy takime. Ka gjasa që trajneri t'i lejojë ata që të bashkohen me Kombëtaren në Stamboll, ku skuadra do të udhëtojë për t'u grumbulluar përpara ndeshjes me Izraelin. Gjithashtu, për shkak të largësisë së tyre, trajneri ka vendosur që Hyka dhe Llullaku të bashkohen me ekipin në Stamboll.