Bregu tregon si mund të “tradhtojë” Luftëtarin

Mesfushori: Mund të largohem nga bluzinjtë vetëm pas një akordi me presidentin

Nëse Luftëtari ia doli të pozicionohej i katërti në klasifikimin përfundimtar të Kategorisë Superiore, protagonistë janë të gjithë faktorët dhe aktorët sportivë në Gjirokastër. Mbi të gjitha janë futbollistët bluzin, duke filluar nga mbrojtja në sulm dhe një prej tyre është pa dyshim Dejvi Bregu. Vlonjati që shkëlqeu me Luftëtarin është në dëshirat e shumë klubeve të Superiores, megjith- atë është nën kontratë me bluzinjtë. "Me Luftëtarin kam nënshkruar një kontratë që më përfundon në qershor të 2018- ës. Për sa kam nënshkruar me këtë skuadër, asnjë ekip tjetër i futbollit shqiptar nuk do të më tundonte për t'i dhënë fund aventurës me ekipin që më afirmoi dhe më vlerësoi për atë që kam dhënë në fushën e lojës. Me konsensusin e presidentit Grigor Tavo do të pranoja çdo ofertë. Unë jam lojtar profesionist dhe respektoj atë që firmos. Te Luftëtari kam gjetur ambientin dhe vendin e duhur për të treguar potencialin tim. Pa dashur të mohoj vlerat e askujt, Luftëtari i këtij sezoni meriton respekt dhe vlerësim maksimal. Në fillim të sezonit na konsideruan të vegjël, por e vërteta është ndryshe. Ky është Luftëtari i ngritur me mund dhe pasion, duke filluar nga presidenca, trajneri dhe gjithë të tjerët. Nëse nuk jemi në Europë, kjo nuk është përgjegjësia jonë. Unë besoj se e kemi merituar vendin e katërt në klasifikim, ndaj dhe jemi të gjithë krenarë për atë që kemi dhënë për Luftëtarin", u shpreh për "Panorama Sport" autori i 9të golave me fanellën e Luftëtarit në këtë sezon futbollistik. MERKATO - Ashtu si klubet e tjera të Superiores, edhe Luftëtari do të ketë lëvizje në merkato si në hyrje, ashtu edhe në dalje. Presidenti Grigor Tavo ka premtuar se skuadra e sezonit të ardhshëm do të jetë më e fortë. Në një deklaratë të dhënë pas përfundimit të dy fazave të para të sezonit të kaluar, ai u shpreh: "Nëse qëndrojmë në Superiore, që është dhe objektivi ynë primar, një tjetër Luftëtar do të shikoni vitin tjetër". Tomor Shehu