Siti zyrtarizon Ederson, gati 250 mln € për merkaton

Mançester Siti bën një tjetër goditje në merkato, edhe pse data e fillimit të saj është më 1 korrik. Ekipi i Guardiolas nuk ka ndërmend të ndalet, duke siguruar shërbimet e portierit të Benfikës, Ederson. Siti do t'u paguajë portugezëve 40 milionë euro për portierin, i cili gjatë sezoneve të fundit ka qenë një nga portierët më të mirë në qarkullim dhe për më shumë kërkohej nga shumë klube angleze dhe spanjolle. Ederson bëhet portieri i dytë më i shtrenjtë në të gjithë historinë, pas Bufonit, i cili kaloi nga Parma te Juventusi për 53 milionë euro. Zyrtarizimi i 24vjeçarit ka ardhur nga vetë klubi i Benfikës, që me anë të një komunikate zyrtare ka bërë të ditur shitjen e Ederson te Mançester Siti.

SHIFRA TË ÇMENDURAEkipi anglez nuk ka ndërmend të ndalet pas blerjeve të mesfushorit Markos Silvas dhe portierit Ederson. Mançester Siti po mendon të shpenzojë dhe 300 milionë euro të tjera për ta përforcuar akoma më shumë ekipin e drejtuar nga Pep Guardiola. Presidenti i klubit, Kaldon Al Mubarak, po mundohet të krijojë një ekip të fortë për spanjollin, në mënyrë që të luftojë për katër trofetë e mundshëm. Guardiola është gjithashtu i interesuar për disa ishshokë të ekipit të Markos Silvës, më konkretisht për mbrojtësin e krahut të majtë, Benxhamin Mendi dhe për sulmuesin e talentuar, Kilian Mbape, që aktivizohen me klubin e Monakos. Për këtë të fundit mund të ketë probleme, pasi vlerësimi 130 milionë euro i Monakos për francezin i duket tepër qesharak ekipit të Sitit, të cilët nuk kanë ndërmend të konkurrojnë me Realin nëse çmimi i sulmuesit nuk ulet. Dy objektiva të tjera të Sitit janë: sulmuesi i Arsenalit, Aleksis Sançez dhe mbrojtësi i Totenhem, Kaili Uoker. Duket se klubi do të bëjë përsëri një merkato të jashtëzakonshme me shifra të çmendura, siç vetëm Mançester Siti di të bëjë.