Sokol Cikalleshi pa frena, e mbyll sezonin me gol në Turqi

Sulmuesi do t'i bashkohet sot Kombëtares

Sokol Cikalleshi nuk di të ndalet në Turqi. Sulmuesi i Kombëtares shqiptare e ka mbyllur sezonin me një gol spektakolar në ndeshjen që skuadra e tij, Akhisar humbi në shtëpi 2- 3 ndaj Karabuksporit. Në minutën e 9-të, pas një krosimi nga krahu i djathtë, Cikalleshi i gjen kohën topit brenda zonës dhe lëshon një predhë me të majtën, duke kaluar në avantazh Akhisarin. Sulmuesi ka luajtur për 90 minuta dhe, pavarësisht humbjes së ekipit, e ka bërë mbylljen më të bukur sezonit, duke konfirmuar formën e shkëlqyer që po kalon. Në 14 ndeshje me fanellën e Akhisar, sulmuesi kuqezi shënoi shtatë gola, duke qenë vendimtar për objektivin e klubit: qëndrimin në Superligën turke. Sot sulmuesi pritet të udhëtojë drejt Luksemburgut, për t'iu bashkuar Kombëtares. Gjasat janë që, për shkak të ngarkesës së madhe, kavajasit të lihen pushim nga trajneri De Biazi për miqësoren me Luksemburgun. STËRVITJA - Kombëtarja ka zhvilluar dje dy seanca stërvitore në Luksemburg. De Biazi kishte bërë një program më të detajuar, duke ua bërë të qartë futbollistëve se kërkon impenjimin maksimal, edhe pse është thjesht një miqësore në prag të eliminatores ndaj Luksemburgut. Lojtarë si Llullaku, Hyka, Cikalleshi dhe Sadiku nuk janë bashkuar ende me grupin, ndërkohë që Balaj nuk do të jetë për shkak dëmtimi. Në seancën e pasdites së djeshme, stafi teknik i kuqezinjve kontrolloi fillimisht të dhënat e marra nga sistem GPS për gjendjen e lojtarëve. Ndërkohë, seanca u mbyll me provat e lojtarëve për të goditur portën.