Bashkia Lushnjë jep garanci për licencimin e stadiumit dhe merkaton
Skuadra e re merr rrugë pas mbledhjes së Këshillit Bashkiak
Opinioni sportiv lushnjar dhe dashamirësit e futbollit verdhejeshil të Lushnjës presin që këtë verë shtëpia e tyre e futbollit, stadiumi "Roza Haxhiu", të rikonstruktohet për të plotësuar kushtet e licencimit për Kategorinë Superiore. Rikonstruksioni i impiantit lushnjar do të arrihet në sajë të bashkëpunimit FSHFBashkia Lushnjë. Për këtë, burime të mirinformuara thanë për "Panorama Sport" se nisja e punimeve është vetëm çështje ditësh. "Plotësimi i detyrave për të krijuar kushtet e kërkuara nga FSHF- ja për zhvillimin e ndeshjeve në "Roza Haxhiu" është domosdoshmëri për Bashkinë e Lushnjës, për të evituar zhvillimin e ndeshjeve në fushë asnjanëse. Investimi Bashki- FSHF do të japë mundësinë që Lushnja të luajë në fushën e saj. Bashkia ka përcaktuar çfarë punimesh do të bëjë në varësi të fondit që ka. Për këtë ka ngritur një grup specialistësh, që të përcaktohen zërat e punës që do të bëjnë, kostot e tyre, duke hartuar preventivin përkatës për të siguruar fondin që nevojitet", pohuan burime nga njësia vendore për gazetën "Panorama Sport".
MERKATO - Klubi lushnjar është në varësi të plotë të Bashkisë së Lushnjës. Ndaj, për të realizuar lëvizjet në merkato duhet pritur mbledhja e radhës e Këshillit Bashkiak, që është njëherësh asambleja e klubit të futbollit. "Pritet një shtesë në buxhet për rrogat dhe premiot e futbollistëve, si dhe të ardhura të tjera. Kjo bëhet për t'i dhënë mundësi klubit që të futet në tregun e lojtarëve, për të bërë përforcimet sipas nevojave të ekipit", thuhet në informacionin që jep Bashkia e Lushnjës për "Panorama Sport". Ndërkaq, drejtues të klubit të ngarkuar nga presidenti Tushe për merkaton e verës kanë piketuar 6-7 afrime, të cilët do të realizohen pasi të jetë marrë garancia financiare. Sipas drejtuesve, ndërhyrjet do të bëhen aty ku ka nevojë skuadra dhe për këtë siç është bërë e njohur janë marrë edhe kontaktet paraprake. Pjesëmarrja në Superiore kërkon një angazhim maksimal nga të gjithë hallkat e klubit lushnjar, në mënyrë që verdhejeshilët të mos mbeten kalimtarë në elitë. Për momentin situata duket premtuese, por gjithçka është në kuadrin e fjalëve, pasi nuk ka asnjë finalizim konkret. Alban Alushi