Besëlidhja në merkato, titullarët drejt largimit

Skuadra e Besëlidhjes vijon pushimet verore, por një gjë e tillë nuk mund të thuhet për menaxherët dhe drejtuesit e klubit që tashmë janë në ethet e merkatos verore. Përveç faktit që duhet të rinovohet skuadra, disa nga titullarët janë në planet e ekipeve të ndryshme të Superiores, por edhe të klubeve jashtë vendit. Te Besëlidhja ditët e fundit ka pasur lëvizje në drejtim të ofertave për disa futbollistë, ku deri tani tre prej tyre janë kërkuar me ngulm nga ekipet elitare, ndërsa sulmuesi guineas Seku Kamara është në planet e skuadrës së Fc.Zorya Luhansk. Për këtë të fundit, pritet të përcaktohet vlera e kartonit të tij dhe pas bisedimeve do të vendoset përfundimisht, nëse do të transferohet apo do të qëndrojë. Nga ana tjetër, mesfushori Lancinet Sidibe dhe mbrojtësi i majtë Edison Ndreca kërkohen nga ekipe brenda vendit, por nuk ka asnjë lëvizje konkrete në këtë drejtim. Rinovimi - Presidenti Gjok Noka ka premtuar një rinovim total të skuadrës për sezonin e ardhshëm, pasi nuk do të heqë dorë nga pretendimi për ngjitje, ndonëse shkalla e vështirësisë për sezonin e ri është shumë më e madhe, pasi në grupin e veriut pritet të futet edhe Tirana, e cila do të luftojë realisht për t'u rikthyer në elitë. Trajneri Alban Bruka që ende zyrtarisht është ende në krye të Besëlidhjes, ndryshe nga presidenti mendon se skuadra ka nevojë për rifreskim, por jo për ndryshim radikal, pasi ruajtja e boshtit do të ishte gjë pozitive. Por, një gjë e tillë pritet të jetë e vështirë, duke qenë se lojtarët titullarë kanë bërë paraqitje të mirë në ndeshjet e Kupës dhe ofertat në drejtim të tyre nuk kanë munguar. Duke parë dëshirën e vetë futbollistëve edhe drejtuesit do ta kenë disi të vështirë që t'i mbajnë lojtarët edhe për një tjetër sezon. Megjithatë, deri në momentin e nisjes së fazës përgatitore asgjë nuk mund të thuhet me siguri në lidhje me atë që mund të ndodhë. Por, ndërtimi i një skuadre të fortë për sezonin e ri duket pak i vështirë. Preng Gjikola