Konte heq Kostën me një “sms”, tani e do Milani
“E turpshme, nuk e di pse s'më do, mbase kam luajtur keq”
Ishkarkuar. Me një mesazh dhe pa paralajmërim. Pas një Premier Lige të fituar si protagonist ( 20 gola të shënuar), aventura e tij te Çelsi përfundon në mënyrën më të shëmtuar të mundshme.
ME TELEFON
Pas miqësores mes Spanjës dhe Kolumbisë, Diego Kosta lëshon bombën e merkatos së momentit: "Konte nuk më do më te Çelsi dhe më largoi me një sms. Është e turpshme". Sulmuesi 28- vjeçar, i cili shënoi 26 gola në 46 ndeshjet e tij me kampionët e Anglisë sezonin e shkuar, thotë se tekniku italian i dërgoi një mesazh në telefon, ku i bënte me dije fatin e tij, i cili ishte larg "Stamford Bridge". Duke folur për gazetarët pas barazimit 22 të Spanjës në testin ndaj Kolumbisë të mërkurën, Kosta tha: "Unë jam një lojtar i Çelsit, por ata nuk më duan më aty. Antonio Konte ma tha me një mesazh se nuk do të jem pjesë e Çelsit, kaq. Konte më tha se nuk besonte më tek unë sezonin e ardhshëm. Është e turpshme. Unë ua përcolla mesazhin e tij drejtuesve të Çelsit për të vendosur. Por është e qartë që trajneri nuk beson më tek unë dhe nuk më do më atje. 'Duhet të gjesh një skuadër', më shkroi". Por Konte e bëri këtë lëvizje, sepse tashmë e di se cilin do të ketë në majën e sulmit sezonin e ardhshëm. Romelu Lukaku ka një akord për t'u rikthyer në "Stamford Bridge". KONFIRMOHET DIVORCI
Por cili ka qenë reagimi i Çelsit pas këtij lajmi? "Nëse trajneri i skuadrës, i cili është ai që i zgjedh lojtarët, të thotë se nuk të do më, atëherë çfarë të mbetet tjetër për të bërë? Mund vetëm të shkosh. Nuk më kanë thërritur, ua përcolla unë mesazhin e Kontes. Tani gjithçka është më e lehtë. Nëse trajneri nuk të do, atëherë Çelsi duhet të më shesë. Përse nuk më duan më? Ah, këtë nuk e di. Duhet të kem bërë një sezon të keq". Bomberi i kombëtares iberike do preferonte të rikthehej tek Atletiko, por atje do ta ketë të pamundur për të luajtur në 4- 5 muajt e ardhshme për shkak të embargos. Tashmë largimi i tij nga Londra është 100% i
sigurt dhe në letra duket se është më i mundur një transferim drejt Kinës apo Italisë, pavarësisht ëndrrës së lojtarit për t'u rikthyer në Madrid. "Nuk e di, është e ndërlikuar. Njerëzit e dinë që unë e dua shumë Atletikon dhe se më pëlqen të jetoj në Madrid. Unë thjesht dua të luaj, kaq". Kosta u transferua te blutë e Londrës në vitin 2014 për shifrën e 32 milionë paundëve dhe prej atëherë ka shënuar 58 gola në 120 ndeshje, duke fituar dy tituj kampion në Angli dhe një Kupë Lige.