Siglohet ekipi me një sulmues, ja arma sekrete e Shqipërisë

Trajneri italian ideon kurthin, ndaj Izraelit vetëm... vrap, presing dhe kontroll të topit

Tre gola të pësuar dhe një lojë jashtëzakon isht e keqe nuk mund të justifikohen vetëm me dy kartonët e kuq. Përballja direkte ndaj Izraelit që u humb në "Elbasan Arena" ka sjellë edhe të gjithë zinxhirin e problemeve për kuqezinjtë, ndaj edhe trajneri De Biazi është duke përgatitur në mënyrën e duhur sfidën për "hakmarrje".

STRATEGJIA - Lojërat e fundit që ka bërë Shqipëria kanë qenë shumë larg paraqitjeve në Europian dhe para Europianit. Për këtë, trajneri ka ngulmuar ndaj të tijve për mënyrën si duhet të sillen në 90-minutëshin e radhës. Presing, vrapime, lojtarë të lëvizshëm dhe grup që nuk do t'i lërë hapësira kundërshtarit. Këto janë kërkesat që ka ushtruar De Biazi ndaj lojtarëve gjatë seancave stërvitore për mënyrën e lojës. Tekniku ka kërkuar që më së paku të mos lejojë kundërshtarin që të udhëheqë takimin, si dhe të mos kenë topin në zotërim gjatë gjithë lojës për t'u organizuar rrezikshëm në portën tonë.

FORMACIONI - Si gjithmonë, De Biazi ka dilema për 11-shen që do të hedhë në fushë. Edhe pse janë zhvilluar pjesa më e madhe e përgatitjeve, pasi sot do të jetë dita e fundit e ushtrimeve intensive para udhëtimit, tekniku italian ka ende mëdyshje për titullarët. Strakosha në kuadrat është i sigurt në 11shen titullare, ndërkohë që përpara tij e gjejnë veten Hysaj, Mavraj dhe Gjimshiti. Vazhdon ende dilema mes Alijit dhe Lenjanit për mbrojtësin e majtë. Në mesfushë, Kukeli thuajse e ka të fituar një fanellë së bashku me Memushajn në të majtë të tij. Abrashi dhe Kaçe po duelojnë mes tyre për një rol në tredhëmbëshin e mesit të fushës, ndërkohë që pas nuk mbetet edhe Basha. Në anët e mesfushës me 5 Roshi pritet të luajë në të djathtë, ndërkohë që Hyka është i avantazhuar ndaj Llullakut në të majtë. Në majën e sulmit, Cikalleshi mbetet i favorizuar përballë Sadikut.