Prezantohet Besnik Hasi, ‘peshkon’ dy yje të Barçës
“E njoh mirë skuadrën, kam plane të mëdha për të realizuar”
Besnik Hasi është prezantuar dje si trajneri i ri i Olimpiakosit, në një konferencë për shtyp që ndiqej me kureshtje nga të gjitha mediat greke. Hasi e ka bërë të qartë që në fillim se objektivi i tij ishte ai i fitoreve në Ligën e Kampioneve ku synonte të çonte ekipin me sukses në fazën në grupe.
TRAJNERI - Shqiptari ka bërë me dije kërkesat që i janë bërë nga drejtuesit e skuadrës si dhe objektivat e tij personalë te kjo skuadër e madhe: "Folëm për herë të parë me Olimpiakosin në javën e kaluar dhe shumë nga ju gazetarët u munduan të më kontaktonin. Kishte një intervistë rreth kësaj teme në Belgjikë, por kjo është hera e parë që flas për Olimpiakosin. Sot ( dje) u arrit marrëveshja me Olimpiakosin dhe mund të flas për të. Jam i lumtur që jam këtu, në këtë klub kaq të madh. Kam ardhur këtu si trajner i Anderlehtit dhe e njoh atmosferën. Lojtarët e mi e ndien dhe u frikësuan nga atmosfera në këtë stadium". Objektivi - "Është nder dhe krenari që presidenti i administratës së klubit më besoi një objektiv kaq të rëndësishëm, si kualifikimi për Ligën e Kampioneve. Kam eksperiencën dhe mund t'ia dal. E njoh skuadrën, e kam parë shpesh. Kam parë 6 ndeshje që nga momenti kur më kontaktuan. I kisha parë
edhe më parë dhe i njoh lojtarët e Olimpiakosit, fola me bordin për futbollistët, kemi folur edhe kush do të vijë për përgatitjet e sezonit. Kemi edhe shumë lojtarë të dhënë huazim, të cilët do t'i shohim nëse e meritojnë një shans. Do të afrojmë edhe shumë të rinj,
pasi unë kam besim tek akademia dhe më pas do të marr vendimet e mia".
SKEMAT - "Filozofia ime është një futboll agresiv dhe dominim ndaj kundërshtarit. Dua të kem sa më parë që të jetë e mundur në dispozicion ekipin, ne trajnerët jemi njerëz të çuditshëm sepse e di që nuk mund ta bëj që tani këtë gjë. Por bashkëpunëtorët e do të mundohen që të kemi ekipin gati sa më parë që të jetë e mundur, që të jetë në gjendjen e duhur para ndeshjes së parë europiane", deklaroi Hasi në konferencë për shtyp.
MERKATO - Zheremi Matjë dhe Kristian Tejo nuk janë në planet e trajnerit të ri të Barcelonës, Ernesto Valverde dhe "Sport.es" raporton se destinacioni i ardhshëm i mbrojtësit katalanas dhe mesfushorit të krahut, që shpenzoi 18 muaj te Fiorentina në formë huazimi, është Olimpiakosi. Helenët, prej sezonit të ri, do të drejtohen nga trajneri Besnik Hasi. Tejo ka një ofertë nga Olimpiakosi, por bisedimet nuk kanë nisur ende. Ndërkohë që Matjë ka ofertë edhe nga Sporting Gijoni, por kampionët e Greqisë janë favoritë.